طالبان سے ملاقات کیلئے افغان حکام نے 250رکنی وفد کی فہرست جاری کر دی

کابل (اُردو پوائنٹ اخبارتازہ ترین - این این آئی۔ 17 اپریل2019ء) افغانستان نے رواں ہفتے دوحہ میں طالبان سے ملاقات کرنے والے وفد کی فہرست شائع کردی جس میں کئی سرکاری افسران بھی شامل ہیں۔غیر ملکی میڈیا کے مطابق صدارتی محل سے شائع ہونے والی 250 افراد کی فہرست میں افغان صدر اشرف غنی، چیف آف اسٹاف عبدالسلام رحیمی اور انتخابات میں ہارنے والے رہنما امراللہ صالح سمیت افغان انٹیلی جنس کے سابق سربراہ بھی شامل ہیں۔

فہرست میں افغانستان کے قبائلی عمائدین، نوجوانوں کے رہنما اور 52 خواتین بھی شامل ہیں۔فہرست میں اسلامی تحریک شریک بانی اور اس کے اعلیٰ رہنما ملا عبدالغنی برادر سمیت طالبان کے اعلیٰ مذاکرات کار اور سابق ڈپٹی وزیر برائے امور خارجہ محمد عباس ستانکزئی شامل ہیں۔

(جاری ہے)

طالبان کی افغان حکومت سے اس سے قبل ملاقات خفیہ طور پر 2015 میں پاکستان میں ہوئی تھی جو افغان طالبان کے رہنما ملا عمر کی ہلاکت کی خبر کے ساتھ فوری ختم ہوگئی تھی۔

18 سالہ امریکی مداخلت کے بعد واشنگٹن کے طویل عرصے سے زور دینے پر قطر میں ہونے والی 3 روزہ مذاکرات کا آغاز جمعے سے ہوگا۔رپورٹ کے مطابق طالبان کی جانب سے دوحہ میں مذاکرات کی سربراہی کرنے والے افراد کی حتمی فہرست کا تاحال اعلان نہیں کیا گیا ۔طالبان نے رواں سال فروری کے مہینے میں ماسکو میں ہونے والے مذاکرات میں افغان نمائندوں سے ملاقات کی تھی تاہم اس میں اشرف غنی حکومت کا کوئی بھی فرد شامل نہیں تھا۔

سابق صدر حامد کرزئی کے ترجمان جو ماسکو مذاکرات میں موجود تھے کا کہنا تھا کہ حامد کرزئی نے دوحہ میں ہونے والے انٹرا افغان کانفرنس کی حمایت کی ہے تاہم وہ اس میں شرکت نہیں کریں گے۔رواں ماہ اقوام متحدہ کا کہنا تھا کہ انہوں نے طالبان کے وفد کے 11 افراد پر سے سفری پابندی ختم کردی ہے تاکہ وہ مذاکرات کا حصہ بن سکیں۔