گورنر پنجاب کو بھی تبدیل کرنے کا فیصلہ

عثمان بزدار کو تبدیل کرنے کا فیصلہ ہوگیا، اعلان 1 سے 2 روز میں ہو جائے گا: صابر شاکر، عثمان بزدار تبدیل ہوں گے تو ان کے ساتھ چوہدری سرور بھی تبدیل کر دیے جائیں گے: حامد

محمد علی جمعہ 19 اپریل 2019 21:22

لاہور (اُردو پوائنٹ اخبارتازہ ترین۔ 19 اپریل2019ء) گورنر پنجاب کو بھی تبدیل کرنے کا فیصلہ، معروف صحافی صابر شاکر کے مطابق عثمان بزدار کو تبدیل کرنے کا فیصلہ ہوگیا، اعلان 1 سے 2 روز میں ہو جائے گا، جبکہ حامد میر کے مطابق عثمان بزدار تبدیل ہوں گے تو ان کے ساتھ چوہدری سرور بھی تبدیل کر دیے جائیں گے۔ تفصیلات کے مطابق پنجاب کی کابینہ میں ممکنہ ردوبدل کے حوالے سے مشاورت کے لئے وزیر اعظم عمران خان نے گورنر پنجاب چوہدری محمد سرور کو اسلام آباد طلب کر لیا ہے۔

گورنر پنجاب اس وقت امریکہ اور کینیڈا کے دورے پر ہیں۔ اپنا دورہ مکمل کر کے آج لاہور کی بجائے اسلام آباد پہنچیں گے جہاں وہ وزیر اعظم سے ملاقات کریں گے۔ تاہم اس حوالے سے دعویٰ کیا گیا ہے کہ گورنر پنجاب چوہدری سرور بھی تبدیل کر دیے جائیں گے۔

(جاری ہے)

نجی ٹی وی چینل کے پروگرام سے گفتگو کرتے ہوئے معروف صحافی صابر شاکر نے دعویٰ کیا ہے کہ وفاقی کابینہ میں اکھاڑ پچھاڑ کے بعد اب وزیراعلی پنجاب عثمان بزدار کی تبدیلی کا فیصلہ بھی کر لیا گیا ہے۔

اس حوالے سے ایک سے دو روز میں باقاعدہ اعلان بھی کر دیا جائے گا۔ جبکہ اس حوالے سے معروف اور سینئر صحافی و اینکر پرسن حامد میر نے بھی اسی قسم کا دعویٰ کیا ہے۔ تاہم حامد میر نے یہ دعویٰ بھی کیا ہے کہ اگر عثمان بزدار کو وزارت اعلی کے عہدے سے ہٹایا گیا، تو ان کے ساتھ ساتھ گورنر پنجاب چوہدری سرور کو بھی عہدے سے ہٹا دیا جائے گا۔ حامد میر نے ان باتوں کا اظہار نجی ٹی وی چینل کے پروگرام سے گفتگو کے دوران کیا۔