ملک بھر میں انفارمیشن ٹیکنالوجی پارکس کی تعمیر کے لئے جلد سروے کیاجائے گا ،قائمہ کمیٹی برائے آئی ٹی

پیر 22 اپریل 2019 14:44

اسلام آباد (اُردو پوائنٹ اخبارتازہ ترین - اے پی پی۔ 22 اپریل2019ء) ملک بھر میں انفارمیشن ٹیکنالوجی پارکس کی تعمیر کے لئے جلد سروے کیاجائے گا جہاں جہاں پارک تعمیر کئے جائیں گے ان مقامات کی بھی نشاندہی کی جائے گی، عدالتی فیصلے کے باوجود چک شہزاد میں آئی ٹی پارک کی جگہ پر قبضہ مافیا کا قبضہ برقرار ہے۔ یہ بات پیر کو رکن قومی اسمبلی علی خان جدون کی صدارت میں قائمہ کمیٹی برائے آئی ٹی کے جلاس میں بتائی گئی۔

(جاری ہے)

اجلاس میں رکن قومی اسمبلی شیرعلی ارباب، نصرت وحید، محمد اسلم خان، جویریہ آہیر، کنول شوزب، محمد ہاشم، سیکرٹری آئی ٹی علی گوہر خان سمیت دیگر حکام بھی موجود تھے۔ اجلاس میں بتایاگیا کہ چک شہزاد میں آئی ٹی پارک کی بائونڈری وال کے حوالے سے بعض افراد نے عدالت سے رجوع کیا تھا۔ جس پر عدالت نے فیصلہ دے دیا ہے تاہم ابھی بھی پارک کی اراضی پر بعض افراد نے قبضہ جما رکھاہے ۔ چک شہزاد آئی ٹی پارک کا 81 فیصد کام مکمل ہو چکا ہے۔ اجلاس میں بتایاگیا کہ اسلام آباد، راولپنڈی میں 5، لاہور میں 8 اور کراچی میں ایک آئی ٹی پارک تعمیر کیا جا رہا ہے۔ قبل ازیں اجلاس کے شرکاء نے سری لنکا میں دہشت گرد حملوں کی شدید مذمت کی اور ایک منٹ کی خاموشی اختیار کی ۔