رمضان المبارک کے دوران انڈسٹری کو بجلی کی مسلسل فراہمی یقینی بنائی جائے، لاہور چیمبر

پیر 22 اپریل 2019 16:20

لاہور (اُردو پوائنٹ اخبارتازہ ترین - اے پی پی۔ 22 اپریل2019ء) لاہور چیمبر کے صدر الماس حیدر، سینئر نائب صدر خواجہ شہزاد ناصر اور نائب صدر فہیم الرحمن سہگل نے حکومت سے رمضان المبارک کے دوران انڈسٹری کو بجلی کی بلاتعطل فراہمی یقینی بنانے کی اپیل کی ہے ، ماضی میں ماہ رمضان کے دوران صنعتوں کو بجلی کی بھاری لوڈشیڈنگ کا سامنا کرنا پڑا ،اب بہت سے پیداواری منصوبے مکمل ہونے کے بعد وافر بجلی موجود ہے جس سے گھریلو صارفین اور انڈسٹری دونوں کی ضروریات باآسانی پوری کی جاسکتی ہیں۔

(جاری ہے)

ایک بیان میں لاہور چیمبر کے عہدیداروں نے کہا کہ صنعتو ںاور گھریلو صارفین دونوں کو بجلی کی مسلسل فراہمی اشد ضروری ہے، انہوں نے کہا کہ تمام ڈسٹری بیوشن کمپنیوں کے پاس ٹرانسفارمرز، کیبلز، کھمبوں اور سامان کا وافرسٹاک ہونا چاہیے تاکہ بوقت ضرورت کسی قلت کا سامنا نہ کرنا پڑے۔ لاہور چیمبر کے عہدیداروں نے کہا کہ صنعتی شعبہ کی ترقی معاشی استحکام کی ضمانت ہے، اسے بلاتعطل بجلی کی فراہمی سمیت حکومت سے ہر قسم کا تعاون چاہیے تاکہ یہ روزگار کی فراہمی اور قیمتی زرمبادلہ ملک میں لانے کے لیے اپنا بھرپور کردار ادا کرسکے۔