ملکی سیاست میں بھونچال، پیپلز پارٹی اور ن لیگ کے متبادل ایک نئی سیاسی جماعت بنانے کا فیصلہ

لاہور (اُردو پوائنٹ تازہ ترین اخبار۔ 23 اپریل 2019ء) : ملک کی سیاسی صورتحال کو دیکھتے ہوئے پاکستان پیپلز پارٹی اور پاکستان مسلم لیگ ن کے متبادل ایک نئی جماعت بنانے کا فیصلہ کر لیا گیا ہے۔ تفصیلات کے مطابق مسلم لیگ ن اور پیپلز پارٹی کے اپنی اپنی قیادت سے ناراض رہنماؤں کی بڑھتی ہوئی تعداد اور دونوں جماعتوں کی مرکزی قیادت کے خلاف سنگین کرپشن کے مقدمات اور نا اہلی کے سبب ملک کے سیاسی اور مقتدر حلقوں نے قومی سطح پر ایک نئی سیاسی جماعت کی تشکیل کا فیصلہ کر لیا ہے۔

میڈیا رپورٹ میں بتایا گیا کہ سینئیر سیاستدان محمد علی درانی اس نئی جماعت کی تشکیل کے لیے کافی متحرک ہیں اور ان کے دونوں بڑی سیاسی جماعتوں کے ناراض رہنماؤں اور کارکنوں سے رابطے بھی جاری ہیں۔ سیاسی ذرائع کے مطابق آئندہ انتخابات تک کرپشن کے مقدمات کی وجہ سے ن لیگ اور پیپلز پارٹی کی قیادت کے مستقل طور پر نااہل ہونے کا خدشہ ہے جس سے ان کا پاکستانی سیاست میں مؤثر کردار بھی تقریباً ختم یا انتہائی کمزور ہو جائے گا۔

(جاری ہے)

اس کے ساتھ ساتھ ان دونوں جماعتوں کی انتخابی طاقت بھی بہت کمزور ہو جائے گی ایسے میں ملک کو ایک نئی قومی سیاسی جماعت کی ضرورت ہو گی جو اس سیاسی خلا کو پر کر سکے۔ محمد علی درانی اس سیاسی جماعت کے قیام کے لیے اپنے دوستوں اور دیگر ہم خیال سیاستدانوں سے رابطہ کر رہے ہیں۔ ذرائع کے مطابق اس جماعت کے قیام کے لیے ایک روڈ میپ تیار کر لیا گیا ہے جس کے مطابق مذکورہ جماعت ن لیگ اور پیپلزپارٹی کے ان رہنماؤں اور کارکنوں کے لیے بڑے متبادل کے طور پر سامنے آئے گی جن کے لیے پاکستان تحریک انصاف میں کوئی جگہ نہیں ہے۔

اس نئی سیاسی جماعت کی وجہ سے ہر انتخابی حلقہ میں ایک مضبوط دھڑا قائم ہو جائے گا۔ نئی سیاسی جماعت کے لیے تین نام شارٹ لسٹ کر لیے گئے ہیں۔ جن میں سے ایک نام محمد علی درانی اپنے دوستوں کی اگلی نشست میں اگلے 24 گھنٹے میں فائنل کرلیں گے۔ پارٹی کے آئین کا ابتدائی مسودہ بھی بنا لیا گیا ہے جبکہ پارٹی کے جھنڈے اور دیگر چیزوں کی تیاری کے لیے ملک کی ایک اشتہاری ایجنسی کو کام دیا گیا ہے۔

واضح رہے کہ مسلم لیگ ن اور پیپلز پارٹی کی اعلیٰ قیادت کے خلاف مقدمات بننے کے بعد سے ہی دونوں جماعتوں میں کچھ ایسے دھڑے بن گئے تھے جنہوں نے قیادت کی کرپشن کا مزید دفاع کرنے سے معذرت کر لی تھی مسلم لیگ ن میں تو فارورڈ بلاک بننے کی خبریں گذشتہ کافی عرصہ سے گردش کر رہی ہیں اور اُمید کی جا رہی ہے کہ ان میں سے کئی سیاسی رہنما جلد ہی حکومتی جماعت میں شمولیت کا اعلان بھی کر دیں گے۔