اسحاق ڈار کے خلاف آمدن سے زائد اثاثہ جات ریفرنس پر سماعت ملتوی

پاناما جے آئی ٹی کے سربراہ واجد ضیاءنے بیان ریکارڈ کروایا

Mian Nadeem میاں محمد ندیم بدھ اپریل 10:20

اسحاق ڈار کے خلاف آمدن سے زائد اثاثہ جات ریفرنس پر سماعت ملتوی
اسلام آباد(اردوپوائنٹ اخبارتازہ ترین-انٹرنیشنل پریس ایجنسی۔ 24 اپریل۔2019ء) سابق وزیر خزانہ اسحاق ڈار کے خلاف آمدن سے زائد اثاثہ جات ریفرنس پرسماعت 8 مئی تک ملتوی ہوگئی ہے. تفصیلات کے مطابق احتساب عدالت میں اسحاق ڈار کے خلاف آمدن سے زائد اثاثہ جات ریفرنس پرسماعت ہوئی‘عدالت میں سماعت کے دوران پاناما جے آئی ٹی کے سربراہ واجد ضیاءنے کہا کہ جے آئی ٹی نے سب کے بیانات ریکارڈ کیے، صدر نیشنل بینک سعید احمد کا بیان بھی ریکارڈ کیا گیا.

واجد ضیاءنے کہا کہ نیب، ایف آئی اے، ایف بی آرسمیت دیگراداروں سے ریکارڈ جمع کیا گیا، سعید احمد نے اپنے نام پر مختلف بینکوں میں اکاﺅنٹس ہونے کی تردید کی.

(جاری ہے)

جے آئی ٹی سربراہ نے کہا کہ سعید احمد نے غیر ملکی بینک میں اکاﺅنٹ کا اعتراف کیا، بینک اکاﺅنٹ اسحاق ڈارکی ہدایت پرکھولا گیا، بینک اکاﺅنٹ کا مقصد قرضے حاصل کرنا کاروبار کوسہولت دینا تھا.

انہوں نے کہا کہ جے آئی ٹی نے اسحاق ڈار کا بیان قلم بند کیا دوران تفتیش معلوم ہوا 92 سے 2008 تک اسحاق ڈارکے اثاثے 91 گنا بڑھے. واجد ضیاءنے کہا کہ اسحاق ڈاراپنے بیان میں اثاثوں میں اضافے سے متعلق وضاحت نہ دے سکے، سعید احمد نے جے آئی ٹی کے سامنے اکاﺅنٹس کے حوالے سے انکار نہیں کیا. جے آئی ٹی سربراہ نے عدالت کو بتایا کہ پیسوں کے بچاﺅ کے لیے ہجویری مضاربہ کے نام سے بھی اکاﺅنٹس کھولے گئے، اسحاق ڈار کے کہنے پر سعید احمد نے ملزم محمد نعیم کو چیک بک دیں.

واجد ضیاءنے کہا کہ ملزم نعیم احمد ہجویری مضاربہ کا ملازم رہا ، اکاﺅنٹس میں ٹرانزیکشنز سے سعید احمد نے انکار کیا تھا. احتساب عدالت نے سابق وزیر خزانہ اسحاق ڈار کے خلاف آمدن سے زائد اثاثہ جات ریفرنس پر سماعت 8 مئی تک ملتوی کردی.