پاکستان سمیت دنیا کے بیشتر حصوں میں رمضان المبارک کا چاند 5مئی نظر نہ آنے کا امکان

سعودی عرب اور اس کے ہمسایہ ممالک میں 5 مئی کو ہی چاند کی رویت ہوگی تاہم پاکستان اور خطے کے دیگر ممالک میں پہلا روزہ 7 مئی کو ہوگا،ڈاکٹرشاہد قریشی

جمعہ 26 اپریل 2019 15:53

پاکستان سمیت دنیا کے بیشتر حصوں میں رمضان المبارک کا چاند 5مئی نظر نہ ..

کراچی (اُردو پوائنٹ اخبارتازہ ترین - این این آئی۔ 26 اپریل2019ء) پاکستان سمیت دنیا کے بیشتر حصوں میں رمضان المبارک کا چاند 5مئی (29شعبان)کو نظر نہ آنے کے قوی امکانات ہیں، جبکہ سعودی عرب اور اس کے ہمسایہ ممالک میں 5 مئی کو ہی چاند کی رویت ہوگی۔ تاہم پاکستان اور خطے کے دیگر ممالک میں پہلا روزہ منگل 7 مئی کو ہوگا۔ جامعہ کراچی کے انسٹی ٹیوٹ آف اسپیس اینڈ پلانیٹری ایسٹرو فزکس کے سابق ڈائریکٹر اور معروف سائنسدان پروفیسر ڈاکٹر شاہد قریشی کے مطابق رمضان کے چاند کی پیدائش 5مئی 2019کو پاکستان کے وقت کے مطابق علی الصباح 3بج کر45منٹ پر ہوگی اور اسی روز غروب آفتاب کے وقت چاند کی عمر 15گھنٹے اور18منٹ ہوگی۔

ڈاکٹر شاہد قریشی کے مطابق غروب آفتاب کے وقت اس کی افق سے بلندی صرف 7 ڈگری ہوگی اور ان حالات میں ہلال کا نظر آنا ناممکن ہے، اسی سبب 5مئی کو غروب آفتاب کے وقت پاکستان میں کسی بھی مقام پر رمضان کا ہلال نظر آنے کا کوئی امکان نہیں ہے۔

(جاری ہے)

چنانچہ پاکستان میں رمضان کا چاند 30شعبان 6مئی کو نظر آ سکے گا اور پہلا روزہ منگل 7مئی کو ہوگا ۔ جبکہ پاکستان کے ہمسایہ ممالک بھارت اور بنگلہ دیش کے علاوہ ایران میں بھی چاندکی رویت 6مئی کو ہی ہوگی اور ان ممالک میں بھی رمضان کا آغاز 7 مئی سے ہوگا۔

ڈاکٹر شاہد قریشی کا کہنا ہے کہ 5 مئی کو رمضان کا ہلال ایشیا، افریقہ اور یورپ سے نظر آنے کا بھی کوئی امکان نہیں ہے، البتہ براعظم جنوبی امریکا کے شمالی علاقوں، وسطی امریکا اور متحدہ امریکا کے جنوبی علاقوں سے ہلال باآسانی دیکھا جا سکے گا۔ادھر سعودی عرب کے قمری کیلنڈرکے حساب سے سعودی عرب اور اس کے ساتھ چلنے والے ہمسایہ ممالک اور علاقوں میں پہلا روزہ 6 مئی کو ہی ہونے کا امکان ہے۔