پاک فوج کے سربراہ جنرل قمر جاوید باجوہ کاکنٹرول لائن کے قریب ناردرن لائٹ انفنٹری مین بٹالین کا دورہ ‘ آئی ایس پی آر

اتوار 5 مئی 2019 00:15

راولپنڈی۔ 4 مئی (اُردو پوائنٹ اخبارتازہ ترین - اے پی پی۔ 05 مئی2019ء) پاک فوج کے سربراہ جنرل قمر جاوید باجوہ نے ہفتے کو کنٹرول لائن کے قریب ناردرن لائٹ انفنٹری مین بٹالین کا دورہ کیا۔پاک فوج کے شعبہ تعلقات عامہ (آئی ایس پی آر)کے مطابق آرمی چیف نے فوجی جوانوں کی آپریشنل تیاری، بلند حوصلے اور جذبے کو سراہا۔

(جاری ہے)

انہوں نے کنٹرول لائن کے قریب رہنے والے کشمیریوں کے تحفظ اور سلامتی کی وجہ سے پاک فوج کی مشکلات کے باوجود بھارت کی بلااشتعال فائرنگ کا منہ توڑ جواب دینے پر بھی جوانوں کی تعریف کی۔انہوں نے کہا کہ ہم ملک کو درپیش دفاع اور سلامتی کے چیلنجز سے اچھی طرح آگاہ ہیں اور ہرمحاذ پر خطرات کو شکست دینے کی صلاحیت رکھتے ہیں۔راولپنڈی کور کے کمانڈر بھی آرمی چیف کے ہمراہ تھے۔