دوران ڈرائیونگ موبائل فون استعمال کرنے پر سابق اسٹارانگلش فٹبالر ڈیوڈ بیکھم پر 6 ماہ کیلئے گاڑی چلانے پر پابندی لگادی گئی

لندن (اُردو پوائنٹ اخبارتازہ ترین - این این آئی۔ 10 مئی2019ء) انگلینڈ کے سابق فٹبالر ڈیوڈ بیکہم پر گاڑی چلاتے ہوئے موبائل فون استعمال کرنے پر 6 ماہ کی ڈرائیونگ کی پابندی عائد کردی گئی۔غیر ملکی میڈیا کے مطابق 44 سالہ سابق کھلاڑی نے 21 نومبر کو لندن میں عوام کی جانب سے نشاندہی کرنے پر اپنی غلطی کا اعتراف کیا۔جنوبی لندن کے بروم لے مجسٹریٹ کورٹ نے فٹبالر کے لائسنس پر 6 ماہ کی پینالٹی پوائنٹس عائد کیے اور 750 پاؤنڈ جرمانہ عائد کرتے ہوئے 100 پاؤنڈ استغاثہ کی فیس اور 75 پاؤنڈ سرچارج فیس ادا کرنے کا بھی حکم دیا۔

ضلعی جج کیتھرین مور کے مطابق ڈیوڈ بیکہم کے لائسنس میں اس سے قبل تیز رفتاری کے باعث 6 پوائنٹس لگے ہوئے تھے جس کے بعد اب لگنے والے پوائنٹس کے بعد وہ 12 پوائنٹ کی حد پار کرچکے ہیں جس سے انہیں پابندی کا سامنا کرنا پڑا۔

(جاری ہے)

عدالت میں انہوں نے اپنا پورا نام، تاریخ پیدائش اور پتہ بتایا۔استغاثہ کے وکیل میتھیو اسپریٹ نے بتایاکہ ڈیوڈ بیکہم کی عوام میں سے ایک شخص نے ٹریفک میں گاڑی چلاتے ہوئے موبائل فون پر بات کرتے ہوئے تصویر کھینچی تھی۔

دفاعی وکیل جرارڈ ٹائیرل کا کہنا تھا کہ ڈیوڈ بیکہم گاڑی آہستہ چلارہے تھے اور اس واقعے کے بارے میں انہیں کچھ خاص یاد نہیں ہے۔انہوںنے کہاکہ جو ہوا اس کو وجہ سے چھپایا نہیں جاسکتا لیکن ان کی نظر میں انہیں کچھ یاد نہیں، انہوں نے اعتراف جرم کرنا تھا اور انہوں نے وہی کیا۔