سینیٹ نے پی آئی اے کا ہیڈ کوارٹرز اسلام آباد منتقل نہ کرنے کی قرارداد کی کثرت رائے سے منظوری دیدی

پیر 13 مئی 2019 13:53

اسلام آباد (اُردو پوائنٹ اخبارتازہ ترین - اے پی پی۔ 13 مئی2019ء) سینیٹ نے پی آئی اے کا ہیڈ کوارٹرز اسلام آباد منتقل نہ کرنے کے لئے قرارداد کی کثرت رائے سے منظوری دیدی۔ پیر کو ایوان بالا کے اجلاس میں اس سلسلے میں سینیٹر شیری رحمن، رضا ربانی، راجہ ظفر الحق، بہرہ مند تنگی اور دیگر ارکان نے قرارداد پیش کی۔

(جاری ہے)

قرارداد پر سینیٹر سسی پلیجو، شیری رحمن، رضا ربانی، مشاہد اللہ خان نے اظہار خیال کرتے ہوئے پی آئی اے کا ہیڈ کوارٹرز اسلام آباد منتقل کی مخالفت کی اور کہا کہ اس اس سے پی آئی اے کی کارکردگی متاثر ہو گی اور قومی خزانے پر بوجھ پڑے گا۔

سینیٹر فیصل جاوید، سینیٹر نعمان وزیر اور دیگر حکومتی ارکان نے کہا کہ جو بھی فیصلہ ہوگا وہ ملک کے مفاد میں ہوگا، اس معاملے پر سیاست نہیں کرنی چاہیے۔ وفاقی وزیر ایوی ایشن ڈویژن غلام سرور خان نے کہا کہ اس معاملے پر کوئی حتمی فیصلہ ابھی تک نہیں ہوا۔ بعد ازاں چیئرمین نے قرارداد منظوری کے لئے ایوان میں پیش کی جسے کثرت رائے سے منظور کر لیا گیا۔