ایمنسٹی صدارتی آرڈیننس پارلیمان کی توہین کے مترادف ہے، پیپلز پارٹی

عمران خان ماضی میں ایمنسٹی اسکیم کے خلاف عدالت جانے کی دھمکی دیتے تھے، تعجب ہے کالا دھن سفید کرنے کی اسکیم اب جائز ہو گئی ہے، شیری رحمن

بدھ 15 مئی 2019 15:37

ایمنسٹی صدارتی آرڈیننس پارلیمان کی توہین کے مترادف ہے، پیپلز پارٹی

اسلام آباد(اُردو پوائنٹ اخبارتازہ ترین - این این آئی۔ 15 مئی2019ء) پاکستان پیپلز پارٹی نے کہا ہے کہ ایمنسٹی صدارتی آرڈیننس پارلیمان کی توہین کے مترادف ہے، عمران خان ماضی میں ایمنسٹی اسکیم کے خلاف عدالت جانے کی دھمکی دیتے تھے، تعجب ہے کالا دھن سفید کرنے کی اسکیم اب جائز ہو گئی ہے۔ بدھ کو پیپلز پارٹی کی نائب صدر سینیٹر شیری رحمان نے صدارتی آرڈیننس پر رد عمل کااظہار کرتے ہوئے کہاکہ عجلت میں پارلیمان کے اجلاس ختم کر کے صدارتی آرڈیننس لایا گیا ہے۔

شیری رحمان نے کہاکہ سینیٹ اور قومی اسمبلی کے اجلاس راتوں رات ملتوی کر دئے گئے تاکہ چپکے سے ایمنسٹی آرڈیننس لایا جائے۔انہوںنے کہاکہ ایمنسٹی صدارتی آرڈیننس پارلیمان کی توہین کے مترادف ہے۔شیری رحمان نے کہاکہ جب دونوں ایوان چل رہے تھے تو حکومت نے ایمنسٹی بل کیوں پیش نہی کیا۔

(جاری ہے)

انہوںنے کہاکہ وزیراعظم صدارتی آرڈیننس سے حکومت چلانے کا اعلان بہت پہلے کر چکے ہیں۔

انہوںنے کہاکہ ماضی میں ایمنسٹی اسکیم کے خلاف عدالت جانے کی دھمکی دیتے تھے، صدر پاکستان نے ایمنسٹی اسکیم آرڈیننس جاری کیاہے۔شیری رحمان نے کہاکہ تعجب ہے کالا دھن سفید کرنے کی اسکیم اب جائز ہو گئی ہے۔شیری رحمان نے کہا کہ پیپلز پارٹی اس صدارتی طرز حکومت کو نہی مانتی۔شیری رحمان نے کہاکہ حکومت نے نو ماہ میں دو منی بجٹ اور دو ایمنسٹی اسکیم دی ہیں، حکومت پہلے گزشتہ ایمنسٹی اسکیم کا حساب دے۔انہوںنے کہاکہ گزشتہ ایمنسٹی اسکیم سے کتنا پیسہ واپس آیا، اور کس نے فائدہ اٹھایا۔