ژ*کوئٹہ، 70سال سے عوام کے ساتھ دھوکہ اور فراڈ ہورہا ہے،مولانا عبدالحق ہاشمی

کوئٹہ(اُردو پوائنٹ اخبارتازہ ترین - آن لائن۔ 17 مئی2019ء) امیر جماعت اسلامی بلوچستان مولانا عبدالحق ہاشمی نے کہا ہے کہ 70سال سے عوام کے ساتھ دھوکہ اور فراڈ ہورہا ہے حکمران رہنے والی جماعتوں نے اپنے کارکنان اور عوام کے ساتھ کیے گئے وعدوں کا پاس نہیں کیا اور بار بار عوام کی توقعات اور امیدوں پر پانی پھیرتے ہوئے اپنی من مانی کی۔آئین کی بادستی اور حاکمیت کا خواب شرمندہ تعبیر نہیں ہوسکا جس کی وجہ سے عام آدمی کا استحصال ہورہا ہے۔

ناجائز دولت جمع کرنے والوں کے لیے قانون موم کی ناک اور عام آدمی کے لیے لوہے کے چنے ثابت ہوتاہے جس کی وجہ سے حکمران اشرافیہ دولت سمیٹ لیتے ہیں اور عوام غربت مہنگائی جہالت اور بیماریوں جیسے مسائل میں الجھے رہتے ہیں اور انہی پریشانیوں میں مبتلا رہ کر آخر ایک دن زندگی کی بازی ہار جاتے ہیںانہوں نے کہا کہ جماعت اسلامی عوام کو ان مسائل اور مسائل پیداکرنے والوں سے نجات دلانے کی جدوجہد کررہی ہے۔

(جاری ہے)

ہم تمام جماعتوں کے کارکنان کو دعوت دیتے ہیں کہ وہ آئیں اور ملک و قوم کو اس گھمبیر صورتحال سے نکالنے کے لیے جماعت اسلامی کی جدوجہد میں شامل ہوجائیں۔ گزشتہ کئی دہائیوں سے عوام کے ساتھ مسلسل دھوکہ اور فراڈ ہورہا ہے۔عوام نے مسائل کے حل کے لیے سیاسی جماعتوں کو جھولیاں بھر بھر کر ووٹ دیئے مگر سیاسی جماعتوں نے عوام کے اعتماد کو بری طرح مجرو ح کیا۔

چہرے بدل بدل کر اقتدار میں آنے والے اصلاً ایک طبقہ اور گروہ کے لوگ ہیں جنہوں نے مختلف پارٹیوں کے جھنڈے اٹھا رکھے ہیں اور جو پارٹی اقتدار میں آتی ہے سارے اس میں جمع ہوجاتے ہیں۔ مختلف حکومتوں میںرہنے والے وزیر مشیر سب ایک ہیں اور موجودہ حکومت میں بھی وہی وزراء ہیں جو پیپلز پارٹی مسلم لیگ اور پرویز مشرف کی کابینہ میں شامل تھے۔ جماعت اسلامی عوام کے دکھوں اور پریشانیوں کا مداوہ کرنے کی صلاحیت رکھتی ہے جماعت اسلامی ملک کی حقیقی جمہوری جماعت ہے جس کا اعتراف ہمارے مخالفین بھی کرتے ہیں ۔

جب تک دیانتدار اور خوف خدا رکھنے والے لوگ اقتدار میں نہیں آتے عوام کے ساتھ اسی طرح دھوکہ اور فریب ہوتا رہے گاجماعت اسلامی عوام سے ہمدردی رکھتی ہے اور ان کے غم اور دکھ بانٹنا چاہتی ہے۔