مقبوضہ بیت المقدس، اسرائیلی وزیر زراعت کی قیادت میں یہودی آبادکار مسجد اقصیٰ داخل، مقدس مقام کی بے حرمتی

پیر 20 مئی 2019 16:45

مقبوضہ بیت المقدس (اُردو پوائنٹ اخبارتازہ ترین - این این آئی۔ 20 مئی2019ء) قابض صہیونی وزیر زراعت اور انتہا پسند سیاستدان اوری ارئیل کی قیادت میں یہودی آباد کاروں کے گروپ مسجد اقصیٰ میں داخل ہوکر مقدس مقام کی بے حرمتی کی۔ اطلاعات کے مطابق اسرائیلی پولیس کی اسپیشل یونٹ کے اہلکاروں کی طرف سے یہودی آبادکاروں کو فول پروف سیکیورٹی مہیا کی گئی تھی۔

(جاری ہے)

مقامی فلسطینی ذرائع کا کہنا ہے کہ انتہا پسند یہودی لیڈر ارئیل نے اپنے ساتھ آنیوالے آباد کاروں کو مسجد اقصیٰ میں مزعومہ ہیکل سلیمانی کے بارے میں بریفنگ بھی دی۔ اس کے بعد یہودی آباد کاروں نے باب السلسلہ کو باہر نکلنے کیلئے استعمال کیا اور وہاں پر بھی اشتعال انگیز حرکات کی گئیں۔ خیال رہے کہ مسجد اقصیٰ میں یہودی آباد کاروں کے اشتعال انگیز دھاوے روز کا معمول بن چکے ہیں اور آئے روز اسرائیلی فوج اور پولیس کی فول پروف سیکیورٹی میں یہودی آباد کار قبلہ اول میں گھس کرمقدس مقام کی بے حرمتی کرتے ہیں۔