رواں مالی سال کے پہلے 10 ماہ کے دوران خوراک کی درآمدات میں 9.85 فیصد کمی ریکارڈ

پیر 20 مئی 2019 16:55

اسلام آباد (اُردو پوائنٹ اخبارتازہ ترین - اے پی پی۔ 20 مئی2019ء) رواں مالی سال کے پہلے 10 ماہ کے دوران خوراک کی درآمدات میں 9.85 فیصد کمی آ گئی۔ جولائی سے اپریل 2018-19ء کے دوران خوراک کی درآمدات 4.7 ارب ڈالر رہیں جو کہ گذشتہ مالی سال کی اسی مدت کے دوران 5.216 ارب ڈالر تھیں۔

(جاری ہے)

پاکستان ادارہ برائے شماریات (پی بی ایس) کے جاری کردہ اعداد و شمار کے مطابق مذکورہ عرصہ کے دوران پام آئل کی درآمدات 10.99 فیصد کی نمایاں کمی کے ساتھ 1.54 ارب ڈالر رہیں جو گذشتہ مالی سال کی اسی مدت کے دوران 1.73 ارب ڈالر تھیں۔

دالوں کی درآمدات 2.3 فیصد کمی کے ساتھ 432.54 ملین ڈالر رہیں جو گذشتہ مالی سال کی اسی مدت کے دوران 442.7 ملین ڈالر تھیں۔ دودھ، کریم اور دودھ سے بنی مصنوعات درآمدات میں بھی 10 فیصد کمی ریکارڈ کی گئی ہے۔ سویابین آئل کی درآمدات 34.3 فیصد کمی کے ساتھ 79.12 ملین ڈالر رہیں۔ اعداد و شمار کے مطابق رواں مالی سال کے پہلے 10 ماہ کے دوران خوراک کی مجموعی درآمدات میں 9.85 فیصد کی کمی آئی ہے۔