ایران کی امریکا سمیت ہر کسی کودردناک نتائج کی دھمکی

امریکہ خطرناک گیم کھیل رہا ہے چھیڑ چھاڑ کی تو دردناک نتائج کا سامنا کرنا پڑیگا‘ وزیر خارجہ جواد ظریف

بدھ مئی 20:02

ایران کی امریکا سمیت ہر کسی کودردناک نتائج کی دھمکی
تہران (اُردو پوائنٹ اخبارتازہ ترین - این این آئی۔ 22 مئی2019ء) ایران کے وزیر خارجہ محمدجواد ظریف نے امریکا کو اسلامی ملک کے ساتھ مزید تناؤ پیدا کرنے پرہر کسی کے لیے دردناک نتائج کی دھمکی دے دی۔غیر ملکی خبررساں ادارے کو انٹرویو دیتے ہوئے الزام لگایا کہ امریکابہت خطرناک گیم کھیل رہا ہے۔انہوں نے کہا کہ اگر تہران کے ساتھ چھڑچھاڑ کی تو ہر کسی کو درد ناک نتائج کا سامنا کرنا پڑے گا۔

خیال رہے کہ امریکا کی جانب سے ایران کے ساتھ جوہری معاہدہ ختم کرنے کے بعد دونوں ممالک کے مابین کشدیدگی بڑھ گئی ہے اور واشنگٹن نے خلیج فارس میں بحری جنگی بیڑا اور بی 52 بمبار تعینات کردیئے ہیں۔انہوں نے کہا کہ ’بحری جنگی بیڑا اور بی 52 بمبار کی تعیناتی کسی واقعے کا آغاز ہوسکتا ہے خاص طور پر ایسے وقت میں جب کچھ لوگ جنگ کے خواہاں ہیں۔

(جاری ہے)

ان کا کہنا تھا کہ امریکا انتہائی خطرناک گیم کھیل رہا ہے۔ خیال رہے کہ امریکا کے صدر ڈونلڈٹرمپ نے اتوار کو ٹوئٹ میں امریکی مفاد سے تضاد کی صورت میں ایران کو تباہ کرنے کی دھمکی دی تھی۔بعدازاں پیر کے روز ٹرمپ نے اپنی ہی دھمکی کا زور توڑتے ہوئے کہا کہ اگر تہران ایک قدم بڑھاتا ہے تو ہم مذاکرات کے لیے تیار ہیں۔لیکن ایرانی وزیر خارجہ نے کہا کہ ایران ایسے لوگوں سے مذاکرات کے لیے آمادہ نہیں جنہوں نے وعدہ خلافی کی ہو۔خیال رہے کہ امریکا کے صدر ڈونلڈٹرمپ 2015 میں ایران کے ساتھ طے پانے والے جوہری معاہدے سے گزشتہ برس دستبردار ہوگئے تھے۔