عمران خان کی زیر قیادت ملک ترقی کر رہا ہے،فضل حکیم خان

جمعرات 23 مئی 2019 17:08

پشاور (اُردو پوائنٹ اخبارتازہ ترین - اے پی پی۔ 23 مئی2019ء) چیئرمین ڈیڈیک سوات فضل حکیم خان نے کہا ہے عمران خان کی قیادت میں ملک تیزی سے ترقی کی منازل طے کر رہا ہے ادارے مضبوط ہو رہے ہیں اور معیشت بھی استحکام کی طرف گامزن ہے۔ ان خیالات کا اظہارانہوں نے ڈیڈیک آفس سیدوشریف میں مختلف وفود سے ملاقات کے دوران کیا ا س موقع پر لوگوں نے فضل حکیم خان کواپنے اپنے علاقوں کے مسائل سے آگاہ کیا جبکہ چیئرمین ڈیڈیک نے اُن مسائل کے حل کیلئے متعلقہ محکموں کو موقع پر ہدایات جاری کیں۔

فضل حکیم خان نے کہاکہ پاکستان تحریک انصاف کی قیادت اور حکومت میں نہ صرف پاکستان کی سمت درست ہو چکی ہے بلکہ یہ ملک ترقی و خوشحالی کی بلندیوں کی طرف گامزن ہے۔ انہوں نے کہا کہ ان کا لوگوں سے براہ راست رابطے کیساتھ ساتھ عوام کی دن رات خدمت کا سلسلہ اسی طرح جاری رہے گا انکے گھر اور دفتر کے دروازے عوام کو ہمیشہ د ن رات کھلے ملیں گے اور وہ کسی ذاتی یا اجتماعی کام کیلئے ان سے بلا ہچکچاہٹ مل سکتے ہیں انہیں عوامی مسائل کے حل میں دلی سکون ملتا ہے۔

(جاری ہے)

انہوں نے مزید کہا کہ پی ٹی آئی کی حکومت نے نظام کی تبدیلی کیلئے تاریخی اقدامات کئے ہیں جن کی بدولت لوگوں کو سستے اور فوری انصاف کی فراہمی اور اداروں کی بحالی ممکن بن چکی ہے جبکہ عوام بھی ہماری اصلاحات اور اقدامات سے خوش ہیں۔ انہوں نے کہا کہ پی ٹی آئی کی حکومت نے اداروں کی مضبوطی اور حکومتی و معاشی نظام میں شفافیت کیلئے خاطرخواہ اقدامات کئے ہیں جو آئندہ نسلوں کیلئے ترقی اور خوشحالی کے مضبوط بنیاد کی حیثیت رکھتے ہیں ہماری حکومت نے ہر سرکاری شعبہ کو اپنے پاؤں پر کھڑاکیا ہے۔