سعودی عرب ”جدہ سیزن“ پروگرام کے تحت 3منٹ میں آن لائن ویزا دینے کا اعلان

ریاض(اردوپوائنٹ اخبارتازہ ترین-انٹرنیشنل پریس ایجنسی۔11 جون۔2019ء) سعودی عرب ”جدہ سیزن“ کے پروگرام کے تحت سیاحتی ویزہ تین منٹ میں دستیاب ہوگا، پروگرام کا مقصد سعودی عرب میں ترقیاتی مواقع کا کو نمایاں کرنے کے ساتھ عالمی سطح پر سعودی عرب کے سیاحتی مقامات کواجاگر کرنا ہے. تفصیلات کے مطابق سعودی عرب میں سیاحت کے فروغ کے لیے قائم ”جدہ سیزن“پروگرام کے تحت صرف تین منٹ میں آن لائن سیاحتی ویزہ جاری کرنے کا اعلان کیا گیا ہے.

انتہائی مختصر وقت میں ویزے کے حصول کا یہ منفرد پروگرام ہے، جس کا مقصد سعودی عرب میں ترقیاتی مواقع کا کو نمایاں کرنے کے ساتھ عالمی سطح پر سعودی عرب کے سیاحتی مقامات کواجاگر کرنا ہے. عرب نشریاتی ادارے کے مطابق جدہ سیزن پروگرام کی طرف سے آن لائن سیاحتی ویزہ کے ذریعے زیادہ سے زیادہ تعداد میں سیاحوں کو جدہ لانا اور انہیں ساحلی شہر کی دل فریب خوبصورتی سے لطف اندوز ہونے کا موقع فراہم کرنا ہے.

جدہ پروگرام کے جنرل سپروائزر انجینیر رائد ابو زنادہ نے کہا کہ ان کے سیاحتی پروگرام سے بالعموم پورے سعودی عرب بالخصوص جدہ میں سیاحت کے پھلنے پھولنے میں مدد ملے گی. رائد ابو زنادہ نے کہا کہ آن لائن سیاحتی ویزہ حاصل کرنے کے ساتھ ساتھ سیاح حضرات جدہ میں ہونے والی موسمی سرگرمیوں میں شرکت کی ٹکٹ بھی حاصل کرسکتے ہیں، یہ ٹکٹ ویزہ کے حصول کے فوری بعد حاصل کی جا سکیں گی.

انہوں نے بتایا کہ کسی بھی غیرملکی سیاح کوجدہ کا سیاحتی ویزہ صرف تین منٹ میں فراہم کیا جائے گا، سیاحوں کے لیے sharek.sa پر خود کو رجسٹرڈ کرانا ہوگا اور رجسٹریشن کے دوران دی گئی معلومات فراہم کرنا ہوں گی. ایک سوال کے جواب میں جدہ سیزن 8 جون سے 18 جولائی 2019 تک جاری رہے گا۔

(جاری ہے)

سیاحتی ویزہ کے حصول کے لیے عمر کی کوئی قید نہیں سیاح حضرات خاندان کے ہمراہ اور انفرادی طورپر بھی ویزہ حاصل کرسکتے ہیں.