مسلم لیگ ن کی نائب صدر مریم نواز کا چئیرمین پی پی پی بلاول بھٹو سے ٹیلی فونک رابطہ

لاہور (اُردو پوائنٹ تازہ ترین اخبار۔ 15 جون 2019ء) : مسلم لیگ ن کی نائب صدر مریم نواز نے پاکستان پیپلز پارٹی کے چئیرمین بلاول بھٹو زرداری سے ٹیلی فونک رابطہ کیا۔ تفصیلات کے مطابق مریم نواز نے بلاول بھٹو زرداری کو جاتی امرا آنے کی دعوت دی جسے پاکستان پیپلز پارٹی کے چئیرمین بلاول بھٹو زرداری نے قبول کر لیا۔ بلاول بھٹو زرداری کل دوپہر ڈیڑھ بجے کے قریب رائے ونڈ میں موجود نواز شریف کی رہائش گاہ جاتی امرا جائیں گے۔

جہاں وہ مسلم لیگ ن کی نائب صدر مریم نواز سے ملاقات کریں گے۔ اس موقع پر مسلم لیگ ن اور پیپلز پارٹی کے اہم رہنما بھی موجود ہوں گے۔ ملاقات میں ملک میں ہونے والی سیاسی گرفتاریوں اور اپوزیشن کی آل پارٹیز کانفرنس کے ایجنڈے پر بات کی جائے گی۔ واضح رہے کہ اس سے قبل بھی پاکستان پیپلز پارٹی کے چئیرمین بلاول بھٹو زرداری نے رمضان المبارک میں اپوزیشن جماعتوں کے لیے ایک افطار ڈنر کا اہتمام کیا تھا جس میں مسلم لیگ ن کے 6 رکنی وفد نے سینئر نائب صدرشاہد خاقان عباسی کی سربراہی میں شرکت کی تھی۔

(جاری ہے)

مسلم لیگ ن کے اس وفد میں مریم نواز، پرویز رشید ، حمزہ شہباز،سردار ایاز صادق ، مریم اورنگزیب بھی شریک تھے۔ مریم نواز کا استقبال چیئرمین پاکستان پیپلز پارٹی بلاول بھٹو اور ان کی ہمشیرہ آصفہ بھٹو نے کیا۔ افطار پارٹی کے بعد سیاسی رہنماؤں میں ملک کی سیاسی صورتحال پر تبادلہ خیال بھی کیا گیا تھا۔ یہاں یہ بات قابل ذکر ہے کہ مسلم لیگ ن کی نائب صدر مریم نواز نے اپنی سیاسی سرگرمیوں کا آغاز کر دیاہے ، حال ہی میں انہوں نے ظفر وال میں ایک سیاسی پاور شو کیا تھا جہاں وہ عوام کی ایک بڑی تعداد کو جمع کرنے اور ان کی توجہ حاصل کرنے میں کامیاب ہو گئی تھیں۔

تاہم اب انہوں نے پاکستان پیپلز پارٹی کے چئیرمین بلاول بھٹو زرداری کو جاتی امرا آنے کی دعوت دی ہے جسے انہوں نے قبول کر لیا ہے۔