فواد چوہدری کی بلاول بھٹو اور مریم نواز کی ملاقات پر شدید تنقید

غریبوں کے لیڈر پرائیویٹ جیٹ سے اترے، کروڑوں کی بلٹ گاڑیوں میں اربوں کی سلطنت پہنچے، فرانس کا پانی پیا پھر مہنگائی اور غریبوں کے حالات پر گفتگو کی، وزیرسائنس و ٹیکنالوجی

عثمان خادم کمبوہ اتوار 16 جون 2019 16:32

فواد چوہدری کی بلاول بھٹو اور مریم نواز کی ملاقات پر شدید تنقید

اسلام آباد(اردوپوائنٹ اخبار تازہ ترین ۔ 16جون2019ء) چیئرمین پاکستان پیپلز پارٹی بلاول بھٹو زرداری مسلم لیگ ن کی نائب صدر مریم نواز کی دعوت پر ملاقات کے لیے جاتی امراء پہنچ تھے اب یہ ملاقات ختم ہو گئی ہے۔ مریم نواز نے گزشتہ روز بلاول بھٹو زرداری کو ظہرانے پر آنے کی دعوت دی تھی جسے بلاول بھٹو نے قبول کر لیا تھا اور اب بلاول بھٹو زرداری سابق وزیراعظم نواز شریف کی رہائش گاہ جاتی امراء پہنچے گئے ہیں جہاں ان کا استقبال مریم نواز شریف نے کیا۔

دونوں رہنماؤں کی ملاقات میں دونوں کی جانب سے قریبی ساتھی بھی شریک ہوئے۔ اس ملاقات کے حوالےسے تنقید کرتے ہوئے وزیرسائنس و ٹیکنالوجی فواد چوہدری نے اپنے ٹویٹر پیغام میں کہا ہے کہ ’غریبوں کے لیڈرز پرائیویٹ جیٹ سے اترے کروڑوں روپے کی بلٹ پروف گاڑیوں میں بیٹھ کر اربوں کی سلطنت میں پہنچے جہاں ڈیزائنر فرنیچر پر تشریف رکھتے ہی فرانس کے پانی سے ان کی تواضع کی گئی اور اس کے بعد سب نے مہنگائی اور غریبوں کے حالات پر گفتگو کی‘۔

(جاری ہے)

خیال رہے کہ مریم نواز اور بلاول بھٹو کی ملاقات جاتی امراء میں مریم نواز اور کیپٹرن(ر) محمد صفدر سے ہوئی جس میں ملکی سیاسی صورتحال پر تبادلہ خیال کیا گیا اس کے علاوہ حکومت کی جانب سے پیش گئے بجٹ پر بھی تبادلہ خیال کیا گیا اور اگلے منصوبہ بندی بھی کی گئی کہ کیسے حکومت کے خلاف چلنا ہے۔ چئیرمین پیپلز پارٹی بلاول بھٹو زرداری کے ہمراہ قمر زمان کائرہ، چوہدری منظور، حسن مرتضی اور مصطفیٰ نواز کھوکھر موجود تھے۔

جب کہ مسلم لیگ ن کی ترجمان مریم اورنگزیب ، رانا ثنا اللہ اور ایاز صادق، محمد زبیر بھی جاتی امراء میں موجود تھے۔ پہلے دونوں رہنماؤں کی وفود کی سطح پر ملاقات ہوئی جس کے بعد مریم نواز اور بلاول بھٹو کی ملاقات شروع ہو گئی جس کے بعد ظہرانہ دیا گیا۔ یاد رہے کہ کل بلاول بھٹو زرداری نے میڈیا سے بات کرتے ہوئے کہا تھا کہ مریم نواز صاحبہ نے انہیں لنچ کی دعوت دی جو انہوں نے قبول کر لی ہے۔

چئیرمین پاکستان پیپلز پارٹی بلاول بھٹو زرداری نے کہا کہ میں ان لوگوں سے ملاقات کروں گا جن کو ملکی مسائل حل کرنے میں دلچسپی ہے ۔ واضح رہے کہ مسلم لیگ نکی نائب صدر مریم نوازنے پاکستان پیپلز پارٹی کے چئیرمین بلاول بھٹو زرداری سے ٹیلی فونک رابطہ کیا تھا اور ملاقات کی دعوت دی تھی جس کے بعد اب بلاول بھٹو نے جاتی امراء میں مریم نواز سے ملاقات کی ہے۔