کھیلوں کے بہترین مفاد میں پاکستان اور بھارت کی ٹیموں کو دو طرفہ کرکٹ کھیلنی چاہئے

وزیر خارجہ شاہ محمود قریشی کی ٹریفورڈ سٹیڈیم پہنچنے پر صحافیوں سے گفتگو

اتوار 16 جون 2019 22:30

کھیلوں کے بہترین مفاد میں پاکستان اور بھارت کی ٹیموں کو دو طرفہ کرکٹ ..

مانچسٹر ۔ (اُردو پوائنٹ اخبارتازہ ترین - اے پی پی۔ 16 جون2019ء) وزیر خارجہ شاہ محمود قریشی نے کہا ہے کہ کھیلوں کے بہترین مفاد میں پاکستان اور بھارت کی ٹیموں کو دو طرفہ کرکٹ کھیلنی چاہئے۔ آئی سی سی کرکٹ ورلڈ کپ 2019کے سلسلہ میں پاکستان اور بھارت کے مابین کھیلے جانے والا میچ دیکھنے کے لئے یہاں ٹریفورڈ سٹیڈیم پہنچنے پر صحافیوں سے گفتگو کرتے ہوئے انہوں نے کہا کہ تاہم کرکٹ تعلقات کی فوری بحالی کا کوئی امکان نہیں کیونکہ ویسے بھی بھارت پاکستان کے ساتھ مذاکرات سے بھاگتا ہے۔

(جاری ہے)

وزیر خارجہ نے کہا کہ کرکٹ برصغیر میں بہت زیادہ مقبول کھیل ہے۔ وزیر اعظم عمران خان نے پاکستان میں کرکٹ کے کھیل کو ایک نئی پہچان دی ہے۔ انہوں نے پاکستانی شائقین کرکٹ کے جذبے کی تعریف کی جو بڑی تعداد میں پاک۔بھارت میچ دیکھنے کے لئے یہاں آئے ہیں۔ انہوں نے توقع ظاہر کی کہ بھارت‘پاکستان کے ساتھ کرکٹ کھیلے گا کیونکہ دنیا کے ساتھ ساتھ خطے میں بھی کھیلوں کا فروغ ضروری ہے۔ شائقین کرکٹ کی طرف سے نواز شریف کے خلاف نعرے بازی کے حوالے سے سوال کے جواب میں انہوں نے کہا کہ یہاں کے لوگ اب سب کچھ جان چکے ہیں۔