بجٹ منظور نہ ہونے دینے کا اعلان کرنے والے وفاق اور صوبوں کی ترقی کے لئے سنجیدہ نہیں

حکومت نے سندھ کیلئے ماضی کے مقابلہ میں 200 ارب روپے اضافی رکھے ہیں بلوچستان اور خیبرپختونخوا میں ضم ہونے والے قبائلی اضلاع کی ترقی کو خاص ترجیح دی گئی ہے اپوزیشن اراکین نے بجٹ سنا نہ ہی پڑھا، پھر کس بنیاد پر اسے عوام دشمن قرار دے رہے وزیراعظم کی معاون خصوصی برائے اطلاعات و نشریات ڈاکٹر فردوس عاشق اعوان کا ٹویٹ

منگل جون 14:30

بجٹ منظور نہ ہونے دینے کا اعلان کرنے والے وفاق اور صوبوں کی ترقی کے ..
اسلام آباد (اُردو پوائنٹ اخبارتازہ ترین - اے پی پی۔ 18 جون2019ء) وزیراعظم کی معاون خصوصی برائے اطلاعات و نشریات ڈاکٹر فردوس عاشق اعوان نے کہا ہے کہ بجٹ منظور نہ ہونے دینے کا اعلان کرنے والے وفاق اور صوبوں کی ترقی کے لئے سنجیدہ نہیں، حکومت نے سندھ کیلئے ماضی کے مقابلہ میں 200 ارب روپے اضافی رکھے ہیں، بلوچستان اور خیبرپختونخوا میں ضم ہونے والے قبائلی اضلاع کی ترقی کو خاص ترجیح دی گئی ہے، اپوزیشن اراکین نے بجٹ سنا نہ ہی پڑھا، پھر کس بنیاد پر اسے عوام دشمن قرار دے رہے۔

منگل کو اپنے ٹویٹ میں انہوں نے کہا کہ ملکی معیشت تباہی کے دہانے پر پہنچانے والے اب عوام کا مزید تیل کیوں نکالنا چاہتے ہیں، نومولود سیاستدان سیاسی بلوغت سے عاری ہیں، انہیں یہ ادراک نہیں کہ یہ بجٹ سندھ سمیت تمام صوبوں کے عوام کے حقوق کے تحفظ کا بھی ضامن ہے، سندھ کے بجٹ کا مقدر اسی وفاقی بجٹ سے جڑا ہے، عمران خان کی عداوت میں سندھ کے عوام سے دشمنی نہ کریں۔

(جاری ہے)

پاکستان تحریک انصاف کی حکومت نے سندھ کیلئے ماضی کے مقابلہ میں تقریباً 200 ارب روپے اضافی رکھے ہیں۔ انہوں نے کہا کہ گزشتہ مالی سال میں این ایف سی کے تحت 616 ارب روپے کے مقابلہ میں رواں مالی سال میں سندھ کیلئے 815 ارب روپے مختص کئے گئے ہیں، یہ حکومت کا وفاق پاکستان کی اکائیوں کو اہمیت دینے کا ثبوت ہے۔ انہوں نے کہا کہ وفاقی بجٹ میں بلوچستان اور خیبرپختونخوا میں ضم ہونے والے قبائلی اضلاع کی ترقی کو خاص ترجیح دی گئی ہے، بجٹ منظور نہ ہونے دینے کا اعلان کرنے والے وفاق اور صوبوں کی ترقی کے لئے سنجیدہ نہیں، جو سیاسی جماعتیں انتخابات میں شکست خوردہ مولانا کی خدمات لے رہی ہیں، اس سے اندازہ ہوتا ہے کہ عوام ان کے ساتھ نہیں۔