وزیراعظم عمران خان نے بھارتی شاعر کا قول خلیل جبران کے نام سے شئیر کر دیا

عمران خان نے ایک قول کو خلیل جبران سے منصوب کر کے کہا ’ جس نے خلیل جبران کے الفاظ سمجھ لیے زندگی میں سکون حاصل کرلیا‘ البتہ وہ الفاظ خلیل جبران کے تھے ہی نہیں، ٹویٹر صارفین نے عمران خان کو آڑے ہاتھوں لے لیا

عثمان خادم کمبوہ بدھ 19 جون 2019 22:03

وزیراعظم عمران خان نے بھارتی شاعر کا قول خلیل جبران کے نام سے شئیر کر ..

اسلام آباد (اردوپوائنٹ اخبار تازہ ترین۔ 19جون2019) وزیراعظم عمران خان نے اپنے ٹویٹر پیغام میں ایک قول کو خلیل جبران سے منصوب کر کے کہا ہے کہ جس نے خلیل جبران کے الفاظ سمجھ لیے زندگی میں سکون حاصل کرلیا۔ وزیراعظم عمران خان نے ٹویٹر پر اپنے پیغام میں خلیل جبران سے منصوب کر کے ایک قول ٹویٹ کیا کہ ’ میں نے خواب میں دیکھا کہ زندگی کا مقصد لطف اندوز ہونا ہے۔

خواب سے بیدار ہو کر دیکھا کہ زندگی خدمت کرنا ہے اور میں عوام کی خدمت کر کے لطف اندوز ہوا ہوں‘۔

لیکن سوشل میدیا صارفین نے اس کی تصحیح کرتے ہوئے بتایا ہے کہ دراصل یہ قول خلیل جبران کا ہے ہی نہیں بلکہ یہ الفاظ بھارتی نامورشاعررابندر ناتھ ٹیگور کے ہیں۔سوشل میڈیا صارفین نے عمران خان کی جانب سے شیئر کیے گئے اس قول کو آڑے ہاتھوں لیا ہے اور خلیل جبران اور رابندرناتھ ٹیگور کو ٹویٹر پر ٹاپ ٹرینڈ بنادیا۔

(جاری ہے)

نامور صحافیوں نے بھی وزیر اعظم کی اس غلطی کی تصحیح کی۔ عمرقریشی نے لکھا کہ یہ رابندرناتھ ٹیگور نے کہا ہے۔

نامور صحافی غریدہ فاروقی نے اس حوالے سے ٹویٹ میں کہا ہے ’جناب یہ رابندرناتھ ٹیگور کے الفاظ ہیں خلیل جبران کے نہیں‘۔

مشہور صحافی اظہر عباس نے کہا ہے ’وزیر اعظم صاحب! میرا خیال ہے کہ یہ ٹیگور کے الفاظ ہیں‘۔

وزیراعظم عمران خان اس سے پہلے بھی ایسی غلطیاں کر چکے ہیں، وزیراعظم نے ایک بیان میں جرمنی اور جاپان کی سرحدوں کے ساتھ ساتھ ہونے کا کہا تھا اس کے علاوہ انہوں نے یہ بھی کہا تھا کہ خیبر پختونخوا میں 10ارب درخت لگائے ہیں اور یہ دونوں باتیں بھی حقائق کے منافی ہیں۔