حیدر آباد میں ٹرین حادثہ،نالائق اعظم مغربی جمہوریت پر چلتے ہوئے اپنے چپڑاسی سے استعفیٰ لے،رانا ثنا اللہ

جمعرات 20 جون 2019 23:24

لاہور(اُردو پوائنٹ اخبارتازہ ترین - آن لائن۔ 20 جون2019ء) پاکستان مسلم لیگ ن پنجاب کے صدر اور سابق صوبائی وزیر قانون رانا ثنا اللہ خان نے حیدر آباد میں جناح ایکسپریس اور مال گاڑی میں ہونے والے تصادم پر وفاقی وزیر ریلوے شیخ رشید احمد کے استعفیٰ کا مطالبہ کرتے ہوئے کہا ہے کہ حادثے میں جاں بحق ہونے والوں کا قاتل شیدا ٹلی ہے ،موصوف کو جب سے وزارت ملی، اس وقت سے ٹرینوں کے حادثات میں کئی گنا اضافہ ہو چکا ہے۔

(جاری ہے)

تفصیلات کے مطابق مسلم لیگ ن کے رہنما رانا ثنا اللہ خان نے حیدر آباد میں ٹرین حادثے پروزیر ریلوے شیخ رشید کے استعفے کا مطالبہ کرتے ہوئے کہا کہ ہر حادثے پر راولپنڈی کا شیطان برساتی مینڈک کی طرح نالہ لئی میں چھپ جاتا ہے،اپوزیشن کے خلاف مراثی پن کے بجائے ریل اور مسافروں پر توجہ دی ہوتی تو حادثہ نہ ہوتا، نالائق اعظم مغربی جمہوریت پر چلتے ہوئے اپنے چپڑاسی سے استعفیٰ لے،حادثے میں جاں بحق ہونے والوں کا قاتل شیدا ٹلی ہے۔

انہوں نے کہا کہ حادثے میں جاں بحق ہونے والوں کے قتل کی ایف آئی آر شیدے ٹلی کے خلاف کرائی جائے .رانا ثنا اللہ نے اللہ تعالی حادثے میں وفات پانے والوں کی مغفرت فرمائے حادثے میں جاں بحق ہونے والوں کے اہل خانہ سے تعزیت اور زخمیوں کی جلد صحت یابی کی دعابھی کی۔