گورنر بلوچستان سے ڈائریکٹر برٹش قونصل سندھ و بلوچستان کی ملاقات ، مختلف امور پر تبادلہ خیال

منگل 25 جون 2019 20:59

گورنر بلوچستان سے ڈائریکٹر برٹش قونصل سندھ و بلوچستان کی ملاقات ، مختلف ..
کوئٹہ(اُردو پوائنٹ اخبارتازہ ترین - این این آئی۔ 25 جون2019ء) گورنر بلوچستان امان اللہ خان یاسین زئی سے منگل کے روز ڈائریکٹر برٹش قونصل سندھ و بلوچستان ( MR. MICHAEL HOULGATE) نے ملاقات کی ملاقات کے دوان خطے میں رونما ہونے والی معاشی و تجارتی تبدیلیاں ، صوبے میں جاری ترقیاتی منصوبے ، تعلیم اور ہنر کے فروغ کے حوالے سے مختلف پہلوؤں پر تبادلہ خیال کیا گیا ۔

(جاری ہے)

اس موقع پر گورنر بلوچستان نے کہا کہ بلوچستان منفرد جغرافیہ محل وقوع اور قیمتی وسائل و معدنیات کا حامل صوبہ ہے طویل سرحدیں رکھنے کی وجہ سے یہاں پر امن و امان کی صورتحال پر قابو رکھنا ایک مشکل کام ہے تاہم ہمارے سیکیورٹی اداروں کی قربانیوں سے بلوچستان میں ترقی کیلئے سازگار ماحول اور امن و امان کی صورتحال میں کافی بہتری آئی ہے۔ ڈائریکٹر مائیکل نے گورنر بلوچستان کو صوبے کے نوجوانوں کو جدید مہارتیں سکھانے ، تعلیم کے زیور سے آراستہ کرنے اور تنقیدی و تحقیقی اذہان ابھارنے کے حوالے سے اپنے آئندہ کے لائحہ عمل سے آگاہ کیا ۔ گورنر نے بلوچستان کے نوجوانوں کیلئے مختلف شعبوں میں تر تیب دینے والے پر وجیکٹس کو سراہا اور اپنی جانب سے ہرممکن تعاون کا یقین دلایا۔