مہنگائی میں اضافے کا تسلسل جاری ہے جولائی کے پہلے ہفتے کے دوران مہنگائی کی شرح میں0.83 فیصداضافہ ریکارڈ کیاگیا

جمعرات 11 جولائی 2019 18:25

کراچی(اُردو پوائنٹ اخبارتازہ ترین - این این آئی۔ 11 جولائی2019ء) مہنگائی میں اضافے کا تسلسل جاری ہے جولائی کے پہلے ہفتے کے دوران مہنگائی کی شرح میں0.83 فیصدجبکہ کم آمدنی والے طبقے کے لیے قیمتوں کے حساس اشاریے میں0.92 فیصد اضافہ ریکارڈ کیا گیا۔

(جاری ہے)

پاکستان بیورو شماریات کے اعداد و شمار کے مطابق4 جولائی کو ختم ہونے والے ہفتے کے دوران ایل پی جی، زندہ مرغی، پیاز، ٹماٹر، چینی، گڑ، چنے کی دال، مٹی کا تیل، دال مونگ، دال ماش، دال مسور، سگریٹ، لہسن، آلو، گندم، آٹا، روٹی سادہ، خوردنی تیل، بیف، مٹن، انڈے، سرخ مرچ، تازہ دودھ ، دہی، مسٹرڈ آئل، باسمتی چاول، اور ویجی ٹیبل گھی سمیت 38 اشیائے ضروریہ کی قیمتوں میں اضافہ ہوا۔

جولائی کے آغاز میں صرف کیلے کی قیمت میں کمی ریکارڈ کی گئی۔ادارہ شماریات کے مطابق پیٹرول، ہائی اسپیڈ ڈیزل، گیس نرخ، بجلی کے نرخ، چائے، ملک پاڈر، نمک، صابن، اری چاول، سمیت 14 اشیا کی قیمتوں میں استحکام رہا۔ادارہ شماریات کے مطابق گزشتہ ہفتے کے مقابلے میں 8 ہزار تا 12 ہزار، 12 ہزار تا 18 ہزار آمدنی، 18 ہزار تا 35 ہزار اور 35 ہزار روپے سے زائد آمدنی والے افراد کے گروپوں کے لیے قیمتوں کے حساس اعشاریے میں بالترتیب 0.90، 0.89، 0.84، اور 0.74 فیصد اضافہ ریکارڈ کیا گیا۔