بالی ووڈ میں سلطان کہے جانے والے سلمان خان کو سوشل میڈیا پر ایک وڈیو اپ لوڈ کرنے پر بڑھاپے اور پاگل کے طعنے ملنے لگے

پیر 15 جولائی 2019 21:20

بالی ووڈ میں سلطان کہے جانے والے سلمان خان کو سوشل میڈیا پر ایک وڈیو ..
ممبئی(اُردو پوائنٹ اخبارتازہ ترین - آن لائن۔ 15 جولائی2019ء) بالی ووڈ میں سلطان کہے جانے والے سلمان خان کو سوشل میڈیا پر ایک وڈیو اپ لوڈ کرنے پر بڑھاپے اور پاگل کے طعنے ملنے لگے ہیں۔بالی ووڈ کے سلطان سمجھے جانے والے اداکار سلمان خان ہر معاملے پر اپنا الگ نکتہ نظر رکھتے ہیں اور اس کا اظہار وہ کرتے رہے ہیں، جس پر انہیں تنقید اور تعریف دونوں ہی ملتی ہیں، ایسا ہی ایک کام انہوں نے سوشل میڈیا پر مشہور بوتل کیپ چیلنج پر کیا ہے۔

بوتل کیپ چیلنج میں لوگ فلائنگ کک کے ذریعے بوٹل کا ڈھکن کھولتے ہیں، اس چیلنج کو پورا کرنے میں جہاں مارشل آرٹس جاننے والوں نے حصہ لیا وہیں ہالی ووڈ اور بالی ووڈ فنکاروں نے بھی اپنی صلاحیتوں کا مظاہرہ کیا لیکن سلمان خان نے اس چیلنج کو انوکھے انداز میں پورا کیا۔

(جاری ہے)

سلمان خان کی جانب سے سوشل میڈیا پر ایک وڈیو جاری کی گئی جس میں دکھایا گیا کہ وہ بوتل کیپ چیلنج کو پورا کرنے کے لیے پہلے فلائنگ کک لگانے کے لیے گھومتے ہیں لیکن کک لگانے کے بجائے پھونک مار کر بوتل کا ڈھکن اڑاتے ہیں۔

اپنی وڈیو کے ساتھ انہوں نے لکھا ہے کہ خود کو مت تھکا اور پانی بچا۔سلمان خان کی وڈیو پر ان کے فالوورز کی جانب سے بڑے مزے مزے کے کمنٹس بھی آئے۔ کرن جین نامی صارف نے لکھا ہے کہ کیا بھائی، یہ تو آپ نے چاہنے والوں کے ساتھ دھوکا کردیا۔ لوگ کیا کہیں گی کیا چیلنج تھا اور آپ نے کیا کردیا۔ اسے بڑھاپے کی نشانیاں کہا جاتا ہے، رہنے دیں آپ یہ نہیں کرپائیں گے۔سمت گوپی نے تو سلمان خان کو مینٹل ذہنی معذور قرار دے کر کہا ہے کہ انہیں اسپتال لے کر جا یہ پاگل ہوگیا ہے۔