سستی روٹی کے نام پر اربوں روپے ہڑپ کرنے والے آج پروپیگنڈہ کررہے ہیں

لاہور ۔ (اُردو پوائنٹ اخبارتازہ ترین۔ 19 جولائی2019ء)   گزشتہ روز ہونے والی شاہد خاقان عباسی کی گرفتاری پر اپوزیشن جماعتوں نے واویلا مچا رکھا ہے۔حالانکہ پوزیشن کے سبھی سرکردہ لیڈروںکے خلاف نیب میں کیسز چل رہے ہیں جبکہ اعلیٰ قیادت پہلے ہی جیل میں بند ہے۔تاہم اب آہستہ آہستہ دیگر لوگوں کو بھی جیل میں ڈالنے کی منصوبہ بندی پر کام کیاجا رہاہے۔

سابق وزیراعظم شاہد خاقان عباسی کی گرفتاری پر مسلم لیگ ن کے صدر شہباز شریف نے پریس کانفرنس میں دھواں دھار تقریر کی اور اس کے جواب میں ترجمان پنجاب حکومت شہباز گل نے بھی سوشل میڈیا سائٹ پر خو ب بھڑاس نکالی۔ترجمان وزیراعلیٰ پنجاب شہباز گل نے کہا ہے کہ نیب آزاد اور خود مختار ادارہ ہے، دبائو سے احتساب کا عمل متاثر نہیں ہوگا۔

(جاری ہے)

شہباز شریف غم نہ کریں، اپنی کرپشن کے باعث جلد شاہد خاقان کے ہمراہ ہوں گے۔

شہباز گل نے سماجی رابطے کی ویب سائٹ ٹویٹر پر اپنے پیغام میں کہا کہ شاہد خاقان عباسی کو نیب نے ایل این جی کیس میں گرفتار کیا ہے، ایل این جی کیس بھی ہمارے دور میں نہیں بنایا گیا تھا۔انہوں نے لکھا کہ کرپٹ لیگ کے ناکام صدر نے کرپشن سے توجہ ہٹانے کی کوشش کی، سستی روٹی کے نام پر اربوں روپے ہڑپ کرگئے آج پروپیگنڈہ کررہے ہیں۔شہباز گل نے کہا کہ عوام کی فلاح کا جھوٹا راگ الاپنے والے ہڑتالیں کرانا چاہتے ہیں، نواز۔

شہباز شریف کا پورا ٹبر کرپشن اور کمیشن میں ملوث رہا ہے، قوم کو گمراہ کرنے کے بجائے ٹی ٹی اور منی لانڈرنگ کی تفصیلات دیں۔انہوں نے مزید کہا کہ احسن اقبال کو بھی ناررووال کرپشن کیس میں جواب دینا ہوگا، کرپٹ لیگ کا شیرازہ بکھر چکا ہے، ان کے ممبران بھی ان کی چوری کا دفاع کر کر کے تنگ آگئے ہیں۔واضح رہے کہ مسلم لیگ ن کے سینئر نائب صدر اور سابق وزیراعظم شاہد خاقان عباسی کو نیب نے گرفتار کرلیا، انہیں آج نیب نے ایل این جی کیس میں طلب کیا تھا تاہم وہ پیش نہیں ہوئے تھے۔یاد رہے کہ چیئرمین نیب جسٹس (ر) جاوید اقبال نے شاہد خاقان کے وارنٹ گرفتاری جاری کر رکھے تھے۔