بھارتی پولیس نے سرکاری افسر کو سرینگر جموں شاہرا ہ پر روک کروالد کا جسد خاکی تدفین کیلئے سرینگر نہیں لے جانے دیا

جمعہ 19 جولائی 2019 13:26

سرینگر(اُردو پوائنٹ اخبارتازہ ترین - این این آئی۔ 19 جولائی2019ء) مقبوضہ کشمیر میں ایک سینئر سرکاری افسر نے کہا ہے کہ وہ نئی دلی میں جاںبحق ہونے والے اپنے والد کا جسد خاکی تدفین کیلئے سرینگر لے جا رہے تھے مگر سرینگر جموں شاہراہ پر تعینات بھارتی پولیس اہلکاروں نے انہیں آگے جانے کی اجازت نہیں دی۔ کشمیر میڈیاسروس کے مطابق ڈائریکٹر مالیات امتیاز وانی نے سماجی رابطوں کی سائٹ ’فیس بک ‘ پر لکھا کہ بھارتی پولیس اہلکاروںنے انہیں نگروٹہ سے آگے ایک جگہ روک لیا اور آگے جانے سے منع کیا۔

(جاری ہے)

انہوںنے لکھا کہ امرناتھ یاترا کی وجہ سے کشمیریوں کے تمام شہری حقوق معطل ہیں ۔ امتیا ز وانی نے استفسار کیا کہ وہ ایک سرکاری افسر ہے لیکن اسکے باوجود انہیں سرینگر جموں شاہراہ پر روک لیا گیا اور اس بات سے اندازہ لگایا جاسکتا ہے کہ ایک عام کشمیری کس قدر مشکلات سے دوچار ہو گا۔ انہوںنے کہا کہ بھارتی پولیس کے انسپکٹر راکیش نے انہیں واضح کہا کہ جسد خاکی کو آگے لے جانے نہیں دیا جائے گا۔ یاد رہے کہ قابض انتظامیہ نے امرناتھ یاترا کے دوران سرینگر جموں شاہراہ پر عام لوگوں کی نقل و حرکت اور سویلین ٹریفک کی آمد ورفت پر پابندی عائد کر رکھی ہے۔