سابق آسٹریلوی کپتان و کمنٹیٹر ای ین چیپل موذی مرض میں مبتلا

جمعہ 19 جولائی 2019 17:13

سڈنی (اُردو پوائنٹ اخبارتازہ ترین - این این آئی۔ 19 جولائی2019ء) آسٹریلوی کرکٹ ٹیم کے سابق کپتان اور مشہور کمنٹیٹر ای ین چیپل جلد کے کینسر میں مبتلا ہوگئے۔کینسر کے علاج کے سلسلے میں ای ین چیپل کی ریڈیو تھراپی ہورہی ہے۔ چیپل کے دو اور بھائی گریگ اور ٹریور چیپل آسٹریلیا کی نمائندگی کرچکے ہیں۔ای ین چیپل آسٹریلیا کیلئے 75 ٹیسٹ میچز کھیل چکے ہیں۔

(جاری ہے)

میڈیا رپورٹس کے مطابق پانچ ہفتے کے علاج کے بعد ان کے کندھے، گردن اور بغل سے کینسر کا خاتمہ ہو گیا ، توقع ہے کہ ای ین چیپل فٹ ہوکر آئندہ ماہ ہونے والی ایشیز سیزیز میں کمنٹری کریں گے،وہ آسٹریلیا کیلئے 5345 رنز بنا چکے ہیں۔ 70سالہ ای ین چیپل کو ایک سال پہلے کینسر کی بیماری نے اپنی لپیٹ میں لیا تھا۔آسٹریلیا کے دو مشہور کرکٹ کمنٹیٹر اور سابق کھلاڑی رچی بینو اور ٹونی گریگ اسی طرح کی بیماری کا شکار ہوکر وفات پاچکے ہیں۔