کالام میں ٹمبر مافیا کے خلاف کاروائی، گاڑی کے خفیہ خانوں سے بڑی تعداد میں لکڑی برآمد

جمعہ 19 جولائی 2019 20:23

پشاور(اُردو پوائنٹ اخبارتازہ ترین - این این آئی۔ 19 جولائی2019ء) کالام میں محکمہ جنگلات نے ایک بڑی کاروائی کے دوران گاڑی کے خفیہ خانوں سے بڑی تعداد میں ٹمبر برآمد کرلیا جبکہ ٹمبر اور گاڑی کو قبضے میں لے کر ملزمان کے خلاف ایف آئی آر بھی درج کرلی گئی ایس ڈی ایف او جنید خان کے مطابق انہیں خفیہ ذرائع سے اطلاع ملی کہ ڈمپر گاڑی کے خفیہ خانوں میں ٹمبر سمگل کرنے کی کوشش کی جارہی ہے جس پر انہوں نے فارسٹ اہلکاروں کو الرٹ کیا فارسٹ جوانوں نے صبح پانچ بجے کے قریب چیک پوسٹ پر ایک مشتبہ گاڑی روک لی جو فوری رینج آفس منتقل کردی گئی جہاں پر خفیہ خانوں کو کھول کر ان سے 17 قیمتی سلیپرز برآمد کرلئے گئے گاڑی اور ٹمبر کو محکمہ فارسٹ نے اپنی تحویل میں لے کر ملزمان کے خلاف مقدمہ درج کرلیا گیا ہے اور مزید تفتیش بھی شروع کردی گئی درایں اثناء چیف کنزرویٹر فارسٹ محمد ریاض خان اور ڈی ایف او رئیس خان کی ہدایات پر پورے ضلع سوات میں ٹمبر مافیا کے خلاف کاروائیاں زوروشور سے جاری ہیں۔