کرنسی کی قدر میں کمی کے باعث چین کو حاصل ہونے والی غیر منصفانہ تجارتی مسابقت کے خاتمے کے لیے آئی ایم ایف سے رجوع کریں گے، امریکا

منگل 6 اگست 2019 13:21

واشنگٹن (اُردو پوائنٹ اخبارتازہ ترین - اے پی پی۔ 06 اگست2019ء) امریکا نے چین کو باضابطہ طور پر کرنسی سے چھیڑ چھاڑ کرنے والا ملک قرار دے دیا ہے۔ گزشتہ روز اہم کرنسیوں کے مقابلے میں چینی یوآن کی قدر میں ریکارڈ کمی نوٹ کی گئی تھی۔ بیجنگ کے اپنی کرنسی کی قدر میں کمی نہ روکنے کے اقدام کو امریکا اور چین کے مابین جاری تجارتی جنگ میں چینی ردِ عمل قرار دیا جا رہا ہے۔

(جاری ہے)

واشنگٹن حکومت کے مطابق امریکا چینی کرنسی کی قدر میں کمی کے باعث چین کو حاصل ہونے والی ’غیر منصفانہ تجارتی مسابقت‘ کے خاتمے کے لیے آئی ایم ایف سے رجوع کرے گا۔ خدشہ ظاہر کیا جا رہا ہے کہ امریکا کے چین کو ’کرنسی میں چھیڑ چھاڑ کرنے والا ملک‘ قرار دیے جانے کے بعد دنیا کی دونوں بڑی اقتصادی طاقتوں کے مابین تجارتی جنگ مزید شدت اختیار کر لے گی۔