ملک میں بیشتر مسائل کی بڑی وجہ آبادی میں بے تحاشا اضافہ ہے، سیدہ فرح اعظمیٰ

جمعہ 9 اگست 2019 23:41

سیالکوٹ(اُردو پوائنٹ اخبارتازہ ترین - آن لائن۔ 09 اگست2019ء) پاکستان تحریک انصاف کی رکن صوبائی اسمبلی سیدہ فرح اعظمیٰ نے کہا ہے کہ ملک میں بیشتر مسائل کی بڑی اور بنیادی وجہ آبادی میں بے تحاشا اضافہ ہے ، بڑھتی ہوئی آبادی کو کنٹرول کرنے کیلئے ہنگامی بنیادوں پر کام کرنے کی ضرورت ہے اس سلسلہ میں محکمہ بہبود آبادی کے افسران اور سٹاف کی اہم ذمہ داری ہے کہ وہ صحت مند اور خوشحال زندگی بسر کرنے کے سلسلہ میں عوام الناس کو چھوٹے کنبہ رکھنے کی ترغیب دیں ۔

(جاری ہے)

یہ بات انہوں نے آج محکمہ بہبود آبادی سیالکوٹ کے ضلعی آفس کے دورہ کے دوران کہی ۔ ڈی او پاپولیشن ویلفیئر سیالکوٹ ندیم چٹھہ، ڈاکٹر فرح ناز کے علاوہ دیگر افسران اور عملہ بھی موجود تھا۔ محکمہ بہبود آبادی سیالکوٹ کے افسران نے ضلع سیالکوٹ میں محکمہ کی جانب سے شہریوں کو فراہم کی جانے والی سہولیات بارے رکن صوبائی اسمبلی کو آگاہ کیا۔ ایم پی اے نے کہاکہ عوام الناس بالخصوص زچہ بچہ کی صحت کو یقینی بنانے کیلئے پیدائش میں مناسب وقفہ کو یقینی بنانے کیلئے شعور اجاگر کریں ۔