وزیر خارجہ مخدوم شاہ محمود قریشی کا کشمیری بھائیوں کے ساتھ اظہارِ یکجہتی کیلئے عیدالاضحی "آزاد کشمیر" میں منانے کا فیصلہ

وزیر خارجہ شاہ محمود قریشی نماز عید مرکزی عید گاہ مظفرآباد آزاد کشمیر میں ادا کریں گے‘ عیدِ کے روز مظفرآباد میں اظہارِ یکجہتی کشمیر ریلی کی قیادت بھی کریں گے‘ دفتر خارجہ

اتوار 11 اگست 2019 17:20

وزیر خارجہ مخدوم شاہ محمود قریشی کا کشمیری بھائیوں کے ساتھ اظہارِ یکجہتی ..

اسلام آباد ۔ (اُردو پوائنٹ اخبارتازہ ترین - اے پی پی۔ 11 اگست2019ء) وزیر خارجہ مخدوم شاہ محمود قریشی نے کشمیری بھائیوں کے ساتھ اظہارِ یکجہتی کیلئے عیدالاضحی "آزاد کشمیر " میں منانے کا فیصلہ کیا ہے۔ دفتر خارجہ کی طرف سے وزیر خارجہ کے دورہ آزاد کشمیر کی تفصیلات کے مطابق وزیر خارجہ مخدوم شاہ محمود قریشی مظفرآباد آزاد کشمیر کیلئے روانہ ہوگئے ہیں، وزیر خارجہ کوہالہ میں مختصر قیام کے دوران اتوار کی شام پریس کانفرنس سے بھی خطاب کریں گے جس میں وہ اس دورہ کی تفصیلات سے آگاہ کریں گے۔

وزیر خارجہ شاہ محمود قریشی نماز عید مرکزی عید گاہ مظفرآباد آزاد کشمیر میں ادا کریں گے۔ وزیر خارجہ عیدِ کے روز مظفرآباد میں اظہارِ یکجہتی کشمیر ریلی کی قیادت بھی کریں گے۔

(جاری ہے)

وزیر خارجہ اپنے دورہ آزاد کشمیر کے دوران مظفرآباد میں مقبوضہ جموں و کشمیر کے پناہ گزینوں کے کیمپ کا بھی دورہ کریں گے اور آزاد کشمیر کے صدر اور وزیر اعظم سے ملاقاتیں کریں گے اور مقبوضہ جموں و کشمیر میں جاری انسانی حقوق کی سنگین خلاف ورزیوں کے حوالے سے لائحہ عمل سے متعلق تبادلہ خیال کریں گے۔

وزیر خارجہ، آزاد کشمیر میں کشمیری حریت قیادت کے ساتھ بھی خصوصی ملاقات کریں گے۔ واضح رہے کہ وزیر خارجہ نے کل تمام سیاسی جماعتوں کے قائدین کو پریس کانفرنس کے ذریعے دعوت دی ہے کہ کشمیر کے مظلوم بھائیوں کے ساتھ اظہار یکجہتی کیلئے سب اکھٹے ہو جائیں۔