اشتہاری مجرمان کی گرفتاری کیلئے کریک ڈاؤن کا آغاز اور مظفرگڑھ کو منشیات سے پاک کیا جائیگا، ڈی پی او مظفرگڑھ

مظفرگڑھ (اُردو پوائنٹ اخبارتازہ ترین - اے پی پی۔ 17 اگست2019ء) ڈی پی او صادق علی ڈوگر نے دفتر پولیس مظفرگڑھ میں سرکل جتوئی کے ایس ڈی پی او، ایس ایچ او، ز اور تفتیشی افسران کے ساتھ ایس پی انوسٹی گیشن چوہدری سجاد احمد گجر کے ہمراہ کرائم میٹنگ کی جہاں انہوں نے تمام زیر تفتیش مقدمات کو علیحدہ علیحدہ چیک کیا اور ان کی پراگریس قانونی پہلو اور میرٹ پر تفتیش پر گفتگو کی، ڈی پی او صادق علج ڈوگر نے زیر تفتیش مقدمات کی جلد اور میرٹ پر تفتیش کی تکمیل کی ہدایات جاری کیں۔

(جاری ہے)

ڈی پی او صادق علی ڈوگر کا کہنا تھا آج ہمیں اس چیز کا عہد کرنا ہے کہ معاشرے کو منشیات سے پاک کرنا ہے اور اس دھندے میں ملوث بڑی مچھلیوں کو پکڑ کر پابند سلاسل کرنا ہے، ان منشیات فروشوں کو اپنی نوجوان نسل سے ہمیشہ ہمیشہ کیلئے دور کرنا ہے، اس سلسلے میں تمام تھانہ جات کی کارکردگی میں ذاتی طور پر مانیٹر کرونگا اور بہترین کارکردگی دکھانے والے افسران و ملازمان کی حوصلہ افزائی کی جائیگی، اس کے علاوہ انہوں نے اشتہاریوں کی گرفتاری کی خصوصی ہدایات جاری کیں۔ ڈی پی او کا کہنا تھا کہ سنگین مقدمات میں ملوث مجرمان اشتہاریوں کی گرفتاری پولیس افسران کی اہم ترین ڈیوٹی ہے۔