آرمی چیف جنرل قمر جاوید باجوہ کی مدت ملازمت میں 3 سال کی توسیع کر دی گئی

پاک فوج کے سربراہ کی مدت میں توسیع کا فیصلہ خطے کے سکیورٹی ماحول کے تناظر میں کیا گیا ہے، وزیر اعظم آفس

پیر 19 اگست 2019 17:41

آرمی چیف جنرل قمر جاوید باجوہ کی مدت ملازمت میں 3 سال کی توسیع کر دی ..

راولپنڈی (اُردو پوائنٹ اخبارتازہ ترین - این این آئی۔ 19 اگست2019ء) وزیر اعظم عمران خان نے پاک فوج کے سربراہ جنرل قمر جاوید باجوہ کی مدت ملازمت میں 3 سال کی توسیع کردی ۔ پیر کو وزیراعظم آفس سے جاری نوٹی فکیشن کے مطابق وزیراعظم عمران خان نے آرمی چیف کو موجودہ میعاد کی تکمیل کے بعد 3 سال کیلئے دوبارہ پاک فوج کا سربراہ مقرر کردیا ہے۔بیان کے مطابق آرمی چیف کی مدت میں توسیع کا فیصلہ خطے کے سکیورٹی ماحول کے تناظر میں کیا گیا ہے۔

خیال رہے کہ آرمی چیف جنرل قمر جاوید باجوہ نے 29 نومبر 2016 پاک فوج کی قیادت سنبھالی تھی اور انہوںنے رواں سال نومبر میں ریٹائر ہونا تھامدت ملازمت میں توسیع کے بعد جنرل قمر جاوید باجوہ نومبر 2022تک پاک فوج کے سربراہ رہیں گے ۔یاد رہے کہ جنرل قمر جاوید باجوہ پاک فوج کی کمان سنبھالنے سے قبل جنرل ہیڈ کوارٹرز (جی ایچ کیو) میں انسپکٹرجنرل آف ٹریننگ اینڈ ایویلیوایشن تعینات رہے، یہ وہی عہدہ ہے جو آرمی چیف بننے سے قبل جنرل راحیل شریف کے پاس بھی تھا۔

(جاری ہے)

جنرل قمر جاوید باجوہ آرمی کی سب سے بڑی 10 ویں کور کو کمانڈ کرچکے ہیں جو لائن آف کنٹرول (ایل او سی) کی ذمہ داری سنبھالتی ہے۔جنرل قمر جاوید باجوہ کینیڈین فورسز کمانڈ اینڈ اسٹاف کالج (ٹورنٹو)، نیول پوسٹ گریجویٹ یونیورسٹی مونٹیری (کیلی فورنیا)، نیشنل ڈیفنس یونیورسٹی اسلام آباد کے گریجویٹ ہیں۔جنرل قمر جاوید باجوہ نے 16 بلوچ رجمنٹ میں 24 اکتوبر 1980 کو کمیشن حاصل کیا۔