حکومت نے الیکشن کمیشن میں سندھ اور بلوچستان سے دو نئے اراکین کی تقرری آئینی طریقہ کار کے تحت کی ،

آئین کے تحت چیف الیکشن کمشنر کے پاس ان ممبران کا حلف لینے سے انکار کا اختیار نہیں، ڈاکٹر فردوس عاشق اعوان

ہفتہ 24 اگست 2019 12:58

حکومت نے الیکشن کمیشن میں سندھ اور بلوچستان سے دو نئے اراکین کی تقرری ..

اسلام آباد (اُردو پوائنٹ اخبارتازہ ترین - اے پی پی۔ 24 اگست2019ء) وزیراعظم کی معاون خصوصی برائے اطلاعات ونشریات ڈاکٹر فردوس عاشق اعوان نے کہا ہے کہ حکومت کی جانب سے الیکشن کمیشن میں سندھ اور بلوچستان سے دو نئے اراکین کی تقرری آئین میں درج طریقہ کار کے تحت کی گئی ہے،آئین کے تحت چیف الیکشن کمشنر کے پاس ان ممبران کا حلف لینے سے انکار کا اختیار نہیں۔

ہفتے کو اپنے ٹویٹ میں ڈاکٹر فردوس عاشق اعوان نے کہا کہ آئین کے تحت چیف الیکشن کمشنر کے پاس نئے ممبران کا حلف لینے سے انکار کا اختیار نہیں،دونوں اراکین دیانتدار اور قانون کے ماہر سمجھے جاتے ہیں۔ انہوں نے کہا کہ ملک بھر سے تمام بار ایسوسی ایشنز اور کونسلزنے بھی ان کی تقرری کی حمایت کی ہے۔واضح رہے کہ چیف الیکشن کمشنر کی طرف سے صدارتی احکامات اور پارلیمنٹ کے نوٹیفکیشن کونظرانداز کئے جانے کے بعد صدر سپریم کورٹ بار امان اللہ کنرانی اور دیگر وکلاء تنظیموں کے قائدین نے چیف الیکشن کمشنر کے اس اقدام کو خلاف آئین قرار دیا ہے۔

(جاری ہے)

ان کا کہنا ہے کہ حکومت آئین کے آرٹیکل 209 کے تحت چیف الیکشن کمشنرکے خلاف ریفرنس دائرکرسکتی ہے، اگر حکومت نے یہ آئینی اختیار استعمال نہ کیا تو سندھ اوربلوچستان کے وکلاء 27 اگست کو ازخود ریفرنس کی درخواست دیں گے۔