ایان علی کے بعد ایک اور ڈالر گرل صوفیا مرزا سامنے آ گئیں

لاہور (اُردو پوائنٹ تازہ ترین اخبار۔ 02 ستمبر 2019ء) : ایان علی کے بعد ایک اور ماڈل گرل صوفیا مرزا منظر عام پر آگئیں جنہیں منی لانڈرنگ میں ملوث قرار دے دیا گیا ہے۔ تفصیلات کے مطابق ماڈل صوفیا مرزا کے منی لانڈرنگ میں ملوث ہونے کی اطلاعات موصول ہو رہی تھیں۔ قومی احتساب بیورو (نیب) نے لااہور کی رہائشی ماڈل صوفیا مرزا پر اغوا برائے تاوان ، منی لانڈرنگ اور دیگر فراڈز میں ملوث ہونے کے الزامات عائد کیے تھے۔

نیب کی جانب سے ڈی جی ایف آئی اے کو بھیجی جانے والی درخواست میں خوش بخت عرف صوفیا مرزا کو ملزم قرار دیتے ہوئے کہا گیا کہ صوفیہ مرزا منی لونڈرنگ میں ملوث ہیں۔ نیب پہلے ہی اس معاملے پر نوٹس لے چکا ہے تاہم آیف آئی اے بھی اس ضمن میں فوری طور پر کارروائی کرے۔

(جاری ہے)

نیب کی جانب سے ایف آئی اے کو بھیجی جانے والی درخواست میں واضح طور پر اداکارہ صوفیہ مرزا کے خلاف کارروائی کرنے کا مطالبہ کیا گیا ہے۔

تاہم صوفیا مرزا نے اپنے اوپر عائد کیے جانے والے تمام الزامات کو سختی سے مسترد کر دیا ہے۔ انہوں نے کہا کہ یہ تمام خبریں اور افواہیں میرے سابق شوہر نے پھیلائی ہیں جو اس وقت ناروے میں موجود ہے۔ میرے خلاف پھیلائی جانے والی تمام جھوٹی خبریں میرے سابق شوہر نے جان بوجھ کر پھیلائیں تاکہ میرے بچوں کے اخراجات اور نان و نفقہ سے متعلق کیس اُس کی حمایت میں چلا جائے۔

انہوں نے نیب کی جانب سے تفتیش و تحقیقات کے لیے رابطہ کیے جانے کی خبروں کی بھی تردید کی اور کہا کہ مجھ سے ان الزامات کے حوالے سے نیب یا ایف آئی اے نے تاحال کوئی رابطہ نہیں کیا۔یہاں یہ بات قابل ذکر ہے کہ ماڈل و اداکار صوفیا مرزا نے کئی ٹی وی پراڈکشنز میں کام کیا۔ صوفیا مرزا پر دو سال قبل فراڈ اور اغوا برائے تاوان میں ملوث ہونے کی اطلاعات بھی تھیں۔ خیال رہےکہ اس سے قبل بھی ایک ماڈل ایان علی منی لانڈرنگ کے جُرم میں جیل کی سزا کاٹ چُکی ہیں۔