پاکستان میں تمام بھارتی چینلوں کی نشریات اور ریسورکے استعمال پر مکمل پابندی ہوگی۔چیئرمین پیمرا

پیر 2 ستمبر 2019 19:48

ملتان ۔02 ستمبر (اُردو پوائنٹ اخبارتازہ ترین - اے پی پی۔ 02 ستمبر2019ء) پاکستان الیکٹرانک میڈیا ریگولیٹری اتھارٹی (پیمرا)کے چیئرمین مرزا اسلم بیگ نے کہا ہے کہ پاکستان میں تمام بھارتی چینلوں کی نشریات اور ریسورکی درآمد، فروغ ،ترسیل اور استعمال پر مکمل پابندی ہوگی۔ ان خیالات کااظہارانہوں نے حسین آگاہی میں پاکستان سیٹلائٹ اور گڈز ایسوسی ایشن کے زیراہتمام کشمیریوں سے اظہاریکجہتی اور ڈی ٹی ایچ ، سی لائن و دیگر غیرقانونی آلات کوتلف کرنے کی تقریب سے خطاب کے دوران کیا۔

انہوں نے کہاکہ پاکستان میں بھارتی چینلوں کے بائیکاٹ کو ہم ایک مشن کے طور پرآگے لے کر چلیں گے اورا س سے کشمیر کاز کوبھی فائدہ ہوگا۔انہوں نے کہاکہ میں خصوصی طورپر اسلام آباد سے بھارتی مواد نذرآتش کرنے ملتان آیا ہوں۔

(جاری ہے)

انہوں نے عوام سے بھی اپیل کی کہ وہ بھارتی چینلوں کا مکمل بائیکاٹ کریں۔انہوں نے رضا کارانہ طورپر ریسور تلف کرنے پر حسین آگاہی کے تاجروں کے اس اقدام کوسراہا۔

اس موقع پر چیئرمین آل پاکستان سیٹلائٹ محمد یاسین بٹ، ہیڈ آف انفورسمنٹ آصف علی میاں، صدرآل پاکستان سیٹلائٹ علی احمد ملک، صدرانجمن تاجران حسین آگاہی شیخ محمد اکرم حکیم اور پیمرا کے دیگر حکام بھی موجودتھے۔تاجروں نے اس موقع پر کہاکہ ہم کشمیریوں اور پاک فوج کے ساتھ ہیں اورکسی صورت بھارتی ڈی ٹی ایچ فروخت نہیںکریںگے ۔ تقریب کے اختتام پر ڈش ٹی وی، ویڈیو کون، ٹاٹا سکائی، جادوباکس اور ریلائنس کے ڈش ریسور جلائے گئے۔