مولانا فضل الرحمان نے عمران خان کی حکومت کے خاتمے کے لیے سیاسی رابطوں کا آغاز کر دیا

اسلام آباد (اردو پوائنٹ تازہ ترین اخبار۔09ستمبر 2019ء) جمعیت علمائے اسلام (ف) کے سربراہ مولانا فضل الرحمن نے اکتوبر میں اسلام آباد لاک ڈاؤن دھرنے کے لیے سیاسی رابطوں کا آغاز کر دیا ہے۔اس حوالے سے ایک میڈیا رپورٹ میں بتایا گیا ہے کہ مسلم لیگ ن ، پیپلز پارٹی اور اے این پی سمیت تمام اپوزیشن جماعتوں کو حکومت مخالف دھرنے میں شرکت کی دعوت دینے کا فیصلہ کیا ہے۔

انہوں نے شیر پاؤ سے ملاقات کی جب کہ اسفند یار ولی سے رابطہ کیا۔محرم الحرام کے بعد بلاول بھٹو، محمود اچکزئی،سراج الحق اور حاصل بزنجو کے ساتھ رابطہ کا فیصلہ کیا ہے۔جب کہ نواز شریف پہلے ہی دھرنے کی حمایت کا پیغام دے چکے ہیں۔دھرنے کا اعلان کرنے کے لیے 18 اکتوبر کو مجلس عاملہ کا اجلاس طلب کر لیا گیا ہے۔19 اکتوبر کو مظفر آباد میں جلسہ ہو گا۔

(جاری ہے)

اسلام آباد دھرنے کے دوران حکومت کے خاتمے،وزیراعظم کے استفعیٰ اور 90 دنوں میں نئے انتخابات کے انعقاد کا مطالبہ کیا جائے گا۔جب کہ حکومت کے خاتمے تک دھرنا جاری رہے گا،اس دھرنے کے حوالے سے ملگ گیر تیاریوں کا سلسلہ جاری ہے،جمعیت کی مجلس عاملہ کی جانب سے صوبہ بھر میں کارکنوں اور عوام کو منظ، و متحرک کرنے کے لیے دوروں کا سلسلہ مکمل کر لیا گیا ہے۔

جب کہ دوسری جانب معروف صحافی و کالم نگار اعزاز سید کا اپنے کالم " نئے طوفان کی تیاریاں" میں کہنا ہے کہ میڈیا مولانا فضل الرحمن کو اتنی اہمیت نہیں دے رہا مگر وہ خاموشی سے ایک طوفان اسلام آباد لانے کی تیاریوں میں ہیں۔ایک بات واضح ہو چکی ہے کہ مولانا فضل الرحمن کا فیصلہ اٹل ہے۔شاید اس لیے جیل میں قید نواز شریف نے کیپٹن ریٹائرڈ صفدر کے ذریعے سے مولانا فضل الرحمن کو پیغام بھیجا ہے کہ وہ اور ان کی جماعت اکتوبر میں ہونے والے احتجاجی دھرنے کی بھرپور حمایت کرتے ہیں،دوسری طرف پیپلز پارٹی فی الحال اس دھرنےکی حمایت سے گریز کیے ہوئے ہیں۔ میرے خیال میں دھرنا کامیاب ہوتا دکھائی دیا تو پیپلز پارٹی سمیت دیگر جماعتیں بھی کامیابی کا حصہ وصول کرنے مولانا کے ساتھ آن ملیں گی۔