اپوزیشن نیب قوانین میں ترمیم کے لئے حکومت پر تنقید کررہی ہے ، چن

اسلام آباد ۔ (اُردو پوائنٹ اخبارتازہ ترین - اے پی پی۔ 12 ستمبر2019ء) وزیر اعظم کے ترجمان ندیم افضل چن نے کہا ہے کہ حزب اختلاف کی جماعتوں نے اس وقت پاکستان تحریک انصاف (پی ٹی آئی) کی حکومت کو تنقید کا نشانہ بنانا شروع کیا جب وہ کاروباری برادری کی سہولت کے لئے قومی احتساب بیورو (نیب) کے قوانین میں اصلاحات لانا چاہتی ہے۔ انہوں نے بدھ کو نجی نیوز چینل سے گفتگو کرتے ہوئیکہا کہ میثاق جمہوریت میں پاکستان پیپلز پارٹی (پی پی پی) اور پاکستان مسلم لیگ (ن) نے نیب قوانین میں ترامیم کرنے پر اتفاق کیا لیکن انہوں نے اپنے دور حکومت میں نیب کے قوانین میں کوئی ترامیم نہیں کیں ۔

ایک سوال کے جواب میں ، انہوں نے کہا کہ نیب قوانین کے تحت مسلم لیگ (ن) اور پیپلز پارٹی کے رہنماؤں کے خلاف احتساب کا عمل جاری ہے جو پچھلے دور میں تشکیل دیا گیا تھا۔

(جاری ہے)

چن نے کہا کہ نیب اپنے قوانین کے مطابق کارروائی کررہی ہے اور حکومت کا اس کے معاملات سے کوئی لینا دینا نہیں ہے۔انہوں نے مزید کہا کہ موجودہ حکومت نے نیب میں کوئی نئی تقرری نہیں کی۔

انہوں نے مزید کہا کہ حکومت مفتاح اسماعیل سمیت کسی بھی شخص کے خلاف کوئی انتقامی کارروائی نہیں کر رہی ۔انہوں نے مزید کہا کہ اس کی کارکردگی کو بہتر بنانے کے لئے ملک کے عدالتی نظام میں اصلاحات لانے کی بھی ضرورت ہے۔ایک سوال کے جواب میں ، انہوں نے کہا کہ وفاقی حکومت کراچی کا کچرا صاف کرنا اور سندھ کے عوام کی حفاظت کو یقینی بنانا چاہتی ہے۔انہوں نے کہا کہ پی ٹی آئی کی حکومت ہمیشہ مینڈیٹ کا احترام کرتی ہے۔