کرکٹ کی 142سالہ قدیم روایات ترک کیے جانے کا امکان

موسم کی سختی جھیلنے کیلئے کرکٹرز کو ٹراﺅزرز کی جگہ شارٹس پہن کر کھیلنے کی اجازت دینے کی تجویز

Zeeshan Mehtab ذیشان مہتاب جمعرات ستمبر 11:53

کرکٹ کی 142سالہ قدیم روایات ترک کیے جانے کا امکان
لندن(اردو پوائنٹ تازہ ترین اخبار۔12ستمبر2019ء) موسمیاتی تبدیلیوں کے براہ راست کرکٹ پر اثر انداز ہونے کا خطرہ بڑھ گیا ، کھلاڑیوں کو موسم کی سختی جھیلنے کیلئے کرکٹ کی 142سالہ قدیم روایات کو ترک کرنا پڑسکتا ہے۔لارڈز میں ایک خصوصی رپورٹ ’ہٹ فار سکس‘ کا اجرا ہوا جس میں کھلاڑیوں کو موسمیاتی تبدیلیوں کے اثرات سے محفوظ رکھنے کیلئے کئی سفارشات پیش کی گئی ہیں، جسکی رو سے کھلاڑیوں کو قدیم روایات کو ترک بھی کرنا پڑسکتا ہے۔

خاص طور پر کرکٹرز اب لمبے ٹراﺅزرز کی بجائے شارٹس میں بھی کھیلتے ہوئے نظر آسکتے ہیں۔رپورٹ میں کہا گیاکہ خاص طور پر بیٹسمینوں کو سخت گرمی سے نمٹنے کیلئے آرام دہ کپڑے پہننے کی اجازت ہونا چاہیے، اسی طرح کٹ اور دوسرا سامان بنانے والے اداروں کو بھی مشورہ دیا گیا ہے کہ وہ ایسے ہیلمٹس، گلوز اور پیڈز وغیر بنائیں جس سے ہوا کا گزر ہو اور پلیئرز کو ٹھنڈا رکھیں۔

(جاری ہے)

رپورٹ میں مزید کہا گیا کہ موسمیاتی تبدیلیوں کے اثرات میں مزید اضافہ ہوگا جبکہ ابھی سے ان کا اثر پڑنے لگا ہے، اس حوالے سے خاص طور پر چوتھے ٹیسٹ میں ڈائریا کا شکار ہونے والے انگلش کپتان جو روٹ کی مثال دی گئی جنھیں ہسپتال سے پھر سیدھا گراﺅنڈ میں لوٹنا پڑا۔آئی سی سی کو بھی کہا گیاکہ وہ نئی ہیٹ پالیسی بنائے، اس حوالے سے آسٹریلیا کو سراہا گیا جہاں پر مختلف ایسوسی ایشنز کی جانب سے گرم موسم کو مدنظر رکھتے ہوئے ہیٹ پالیسی اپنائی گئی، جس میں درجہ حرارت ایک مقررہ حد سے بڑھ جانے پر میچ کو ملتوی تک کردیا جاتا ہے۔