احتساب عدالت نے آصف زرداری کو جیل میں اے سی کی سہولت کی فراہمی طبی ماہرین کی رائے سے مشروط کر دی

جمعہ 13 ستمبر 2019 22:03

اسلام آباد ۔ (اُردو پوائنٹ اخبارتازہ ترین - اے پی پی۔ 13 ستمبر2019ء) احتساب عدالت نے سابق صدر آصف علی زرداری کو جیل میں اے سی کی سہولت کی فراہمی طبی ماہرین کی رائے سے مشروط کر دی ہے۔ احتساب عدالت نے محفوظ فیصلہ سناتے ہوئے کہا کہ میڈیکل آفیسر اے سی تجویز کریں تو سابق صدر کو اے سی کی اجازت دی جائے ۔ جمعہ کو احتساب عدالت کے جج محمد بشیر نے درخواست پر سماعت کی۔

اس موقع پر سابق صدر آصف علی زاردری کے وکیل نے دلائل دیئے کہ آصف زرداری دل کے مریض ہیں، انہیں سات سٹنٹ ڈلے ہوئے ہیں، عدالتی حکم کے باوجود آصف علی زرداری کو اے سی کی سہولت نہیں دی گئی۔اس موقع پر نمائندہ جیل عدیل نے دلائل دیے کہ سابق وزیر اعظم محمد نواز شریف کو میڈیکل گراؤنڈز پر اے سی کی سہولت فراہم کی گئی تھی۔

(جاری ہے)

جس پر جج محمد بشیر نے ریمارکس دیے کہ اسے چھوڑ دیں، ہر کیس ایک نوعیت کا نہیں ہوتاقانون جب اجازت دیتا ہے تو اے سی کیوں نہیں دے رہے قانون کوئی ڈیکوریشن پیس نہیں کہ سجا کے رکھ دیا جائے روایات پر نہیں بلکہ قانون پر عمل کریں ۔

عدالت نے نمائندہ جیل سے استفسار کرتے ہوئے کہا کہ بیٹر کلاس کے ملزم کو اے سی کی سہولت دی جاتی ہے تو کیوں نہیں دے رہے ۔جج محمد بشیر نے دلائل سننے کے بعد فیصلہ محفوظ کیا اور بعد میں سناتے ہوئے سابق صدر کو اے سی کے لئے میڈیکل آفسر سے رابطے کی ہدایت کی اور قرار دیا کہ اگر میڈیکل آفسیر اے سی تجویر کریں تو آصف علی زرداری کو جیل میں اس سہولت کی اجازت دے دی جائے۔