کشمیری عمران خان کو اپنا سفیر سمجھتے ہیں ،مودی میں ہمت ہے تو عمران خان کی طرح کشمیری عوام سے خطاب کر کے دکھائیں، شاہ محمود قریشی

مودی میں ہمت ہے تو وہ کرفیو اٹھائے ،پھر اپنا تماشا دیکھے،دنیا نے دیکھ لیا عاشورہ جلوس ، نماز عید، قربانی پر پابندی لگائی گئی ، وزیراعظم کشمیری عوام کا مقدمہ لڑینگے، فتح کشمیریوں کی ہوگی

جمعہ 13 ستمبر 2019 22:46

کشمیری عمران خان کو اپنا سفیر سمجھتے ہیں ،مودی میں ہمت ہے تو عمران خان ..

مظفر آباد (اُردو پوائنٹ اخبارتازہ ترین - این این آئی۔ 13 ستمبر2019ء) وزیر خارجہ شاہ محمود قریشی نے کہا ہے کہ سفیر کشمیر عمران خان کشمیریوں کی آواز اقوام متحدہ لے کر جا رہے ہیں، پوری کشمیری قوم عمران خان کو اپنا سفیر سمجھتی ہے، بھارتی وزیراعظم نریندر مودی میں ہمت ہے تو وہ وزیراعظم عمران خان کی طرح کشمیری عوام سے خطاب کر کے دکھائیں، مودی میں ہمت ہے تو وہ کرفیو اٹھائے اور پھر اپنا تماشا دیکھے۔

جمعہ کو مظفر آباد میں کشمیری عوام سے اظہار یکجہتی کے لئے منعقدہ جلسہ عام سے خطاب کرتے ہوئے وزیر خارجہ شاہ محمود قریشی نے کہا کہ مودی نے ما?ں بیٹیوں کے سپوتوں کو کیوں پابند سلاسل کر رکھا ہے، دنیا سوال کر رہی ہے کہ آزاد کشمیر میں ٹی وی دیکھا جا رہا ہے، اخبارات چل رہے ہیں، انٹرنیٹ اور موبائل سروس چل رہی ہے، مقبوضہ کشمیر میں یہ سب کیوں بند ہیں، کشمیری عوام پر پولیس کے پہرے کیوں ہیں، کیوں لاکھوں کی تعداد میں فوج تعینات کر رکھی ہیں۔

(جاری ہے)

انہوں نے کہا کہ دنیا نے دیکھ لیا ہے کہ عاشورہ کے جلوس پر پابندی لگائی گئی، عید کی نماز نہیں پڑھنے دی گئی، قربانی نہیں کرنے دی گئی، جمعہ کی اذان ہوتی ہے تو کرفیو کو مزید سخت کر دیا جاتا ہے۔ انہوں نے کہا کہ سفیر کشمیر عمران خان کشمیریوں کی آواز اقوام متحدہ لے کر جا رہا ہے اور پوری کشمیری قوم عمران خان کو اپنا سفیر سمجھتی ہے۔ وزیر خارجہ نے کشمیری عوام کو یقین دلایا کہ عمران خان پوری دنیا کے سامنے کشمیری عوام کا مقدمہ لڑیں گے اور فتح کشمیریوں کی ہوگی۔