نامور شاعر ،ماہرتعلیم اور دانشور پروفیسر حسین سحر کی تیسری برسی 15ستمبر کومنائی جارہی ہے

ہفتہ 14 ستمبر 2019 13:32

ملتان (اُردو پوائنٹ اخبارتازہ ترین - اے پی پی۔ 14 ستمبر2019ء) نامور شاعر ،ماہرتعلیم اور دانشور پروفیسر حسین سحر کی تیسری برسی 15ستمبر کومنائی جارہی ہے۔پروفیسر حسین سحر 10اکتوبر1942ء کوجلال آباد ضلع فیروز پور (بھارت)میں پیدا ہوئے۔ قیام پاکستان کے بعد پہلے قصور اور مارچ 1948ء میں ملتان آگئے۔انہوں نے عمربھر اسی شہر میں علم وادب کی خدمت کی۔پروفیسر حسین سحر نے اردو،پنجابی اور علوم اسلامیہ میں ایم اے کے علاوہ قانون کی ڈگری بھی حاصل کی۔

(جاری ہے)

انہوں نے لیکچرار کی حیثیت سے کیریئر کا آغاز کیا اور سول لائنز کالج ملتان اور ولایت حسین کالج سمیت مختلف اداروں میں خدمات انجام دیں۔ وہ پرنسپل کے عہدے سے ریٹائرمنٹ کے بعد سعودی عرب چلے گئے اورطویل عرصہ وہاں گزارا۔اردو اور پنجابی کے شعری مجموعوں ،تنقیدی مضامین سمیت مختلف موضوعات پر ان کی 30سے زیادہ کتب شائع ہوئیں۔ ان کا سب سے اہم کام قرآن پاک کا منظوم ترجمہ ہے جو’’ فرقان عظیم‘‘ کے نام سے شائع ہوا۔ حسین سحرکی خودنوشت ’’ شام وسحر‘‘ کے نام سے ان کی وفات کے بعد منظرعام پرآئی۔نعت و سیرت نگاری پر انہیں صدارتی ایوارڈ سے سمیت مختلف اعزازات سے نوازاگیا۔15ستمبر2016ء کو ملتان میں انتقال کرگئے ۔