خواتین سے نقدی اور طلائی زیورات چھیننے والا ملزم رنگے ہاتھوں گرفتار

ملزم عصمت اللہ بین الاضلاعی گینگ کا سرغنہ نکلا،ایس پی صدر رائے مظہر اقبال کی بریفنگ

ہفتہ 14 ستمبر 2019 19:58

راولپنڈی14ستمبر(اُردو پوائنٹ اخبارتازہ ترین - اے پی پی۔ 14 ستمبر2019ء) تھانہ صدر بیرونی پولیس نے دوران شاپنگ خواتین سے نقدی اور طلائی زیورات چھیننے والا ملزم رنگے ہاتھوں گرفتارکر لیا ، ملزم بین الاضلاعی ڈکیت کا سرغنہ نکلا ، ۔

(جاری ہے)

ایس پی صدر رائے مظہر اقبال نے سٹی پولیس آفیسر ڈی آئی جی محمد فیصل رانا کو بریفنگ دیتے ہوئے بتایا کہ تھانہ صدر بیرونی کے علاقہ میں ایک ملزم شاپنگ کیلئے آنیوالی خواتین سے اسلحہ کے زور پر نقدی اور طلائی زیورات چھیننے والے ملزم کو پکڑ لیا گیا ہے ، عوام نے اسے پولیس کے حوالے کیا ، ملزم کی شناخت عصمت اللہ کے نام سے ہوئی جو بین الاضلاعی گینگ کا سرغنہ نکلا ، سی پی او محمد فیصل رانا نے صدر ڈویژن پولیس کی کارکردگی پر ایس پی رائے مظہر اقبال کو شاباش دیتے ہوئے کہا کہ ملزم کے ڈکیت گینگ کے دیگر ساتھیوں اور سہولت کاروں کو بھی گرفتار کیا جائے ،انہوں نے کہا کہ بازار میں خرید و فروخت کیلئے آنیوالے مرد وخواتین کی جان و مال کا تحفظ پولیس کی ذمہ داری ہے ، بازاروں میں گاڑیوں اور موٹرسائیکلوں پر پولیس گشت کے علاوہ مرد و خواتین پولیس اہلکاروں پر مشتمل سکواڈ تشکیل دئیے جائیں جو پیدل گشت کریں ، سی پی او نے ہدایت کی کہ گرفتار ملزمان سے مختلف وارداتوں میں چھیننا جانے والا تمام سامان برآمد کیا جائے اور ٹھوس ثبوتوں کے ساتھ ملزمان کو عدالت میں چالان کیا جائے ۔