ڈینگی کے پھیلائو کے حوالے سے موجودہ موسم انتہائی حساس و خطرناک ہے، تمام اداروں اور عوام کو تدارکی اقدامات یقینی بنانے کی ہدایت

پیر 16 ستمبر 2019 13:42

فیصل آباد (اُردو پوائنٹ اخبارتازہ ترین - اے پی پی۔ 16 ستمبر2019ء) ڈینگی کے پھیلائو کے حوالے سے موجودہ موسم انتہائی حساس و خطرناک ہے لہٰذاتمام ادارے اور عوام فوری تدارکی اقدامات یقینی بنائیں نیز انسداد ڈینگی مہم سے وابستہ محکموں کے افسران وسٹافر اپنی آنکھیں کھلی رکھیں اور فیلڈ میں متحرک انداز میں کام کرتے ہوئے شہریوں میں ڈینگی سے بچائو کیلئے صفائی ستھرائی و احتیاط کے بارے میں احساس اور آگہی کو یقینی بنائیں ۔

علاوہ ازیں اس سلسلہ میں علماء کرام اور آئمہ حضرات بھی اپنے خطبات میں لوگوں کو ڈینگی کے خطرات اور اس سے بچائو کے طریقوں سے آگاہ کریں۔ فیصل آبادڈویژنل انتظامیہ کے ترجمان نے انسداد ڈینگی کے بارے میں بتایا کہ ڈینگی سے بچنے کیلئے احتیاطی وحفاظتی اقدامات کو مزید تیز کیا جارہاہے اور اس سلسلے میں آٹھوں بازار، ویگنوں وبسوں کے اڈوں، کباڑ خانوں،پرائیویٹ ہسپتالوں، فیکٹریوں، قبرستانوں، پارکوں،گنجان آبادیوں،برساتی نالوں،نرسریوں،تعلیمی اداروں وڈسپنسریوںاور دیگر ضروری مقامات کی باربار چیکنگ بھی کی جارہی ہے کیونکہ اس موسم میں سستی وعدم توجہی کی گنجائش نہیں۔

(جاری ہے)