خصوصی اجازت کے بعد شہباز شریف کی نواز شریف سے جیل میں ملاقات، حمزہ شہباز سے بھی ملے

لاہور(اُردو پوائنٹ اخبارتازہ ترین - این این آئی۔ 16 ستمبر2019ء) پاکستان مسلم لیگ (ن) کے صدر محمدشہباز شریف نے اپنے بڑے بھائی ،پارٹی قائد محمد نواز شریف اور اپنے بیٹے حمزہ شہباز سے کوٹ لکھپت جیل میں ملاقات کی جس میں مختلف اہم امور پر تبادلہ خیال کیا گیا ،لیگل ٹیم کے اراکین نے بھی نواز شریف سے جیل میں ملاقات کی ۔ کوٹ لکھپت جیل میں قید نواز شریف سے اہل خانہ کی ملاقات کیلئے جمعرات جبکہ حمزہ شہباز کے لئے ہفتے کا دن مختص ہے تاہم شہباز شریف نے خصوصی اجازت کے بعد گزشتہ روز نوازشریف اور حمزہ شہباز سے ملاقات کی ۔

ذرائع کے مطابق شہباز شریف نے پارٹی قائد محمدنواز شریف کو جے یوآئی (ف) کے سربراہ مولانا فضل الرحمان سے ہونے والی ملاقات اور پارٹی کی سی ای سی کا اجلاس طلب کرنے کے حوالے سے آگاہ کیا ۔

(جاری ہے)

ذرائع کے مطابق شہباز شریف نے نواز شریف کو مریم نواز اور حمزہ شہباز سمیت خاندان کے دیگر افراد کے کیسز کے حوالے سے بھی آگاہ کیااورمختلف امور پر رہنمائی لی ۔

ایک نجی ٹی وی کے مطابق پارٹی کے سیکرٹری جنرل احسن اقبال اور مرکزی رہنما خواجہ آصف بھی ملاقات میں موجود تھے ۔شہباز شریف نے اپنے بیٹے حمزہ شہباز سے ملاقات کرکے ان کی خیریت دریافت کی اور کیسز کے حوالے سے تبادلہ خیال کیا ۔ مختلف کیسز میں پیروی کرنے والے وکلاء کی ٹیم نے بھی جیل میں نواز شریف سے ملاقات کر کے مختلف قانونی نکات پر تبادلہ خیال کیا ۔ دوسری جانب شریف برادران کے درمیان خصوصی ملاقات کے حوالے سے سیاسی حلقوں میں چہ مگوئیاں کی جارہی ہیں اور اس ملاقات کو غیر معمولی قرار دیا جارہا ہے ۔