خانہ کعبہ کے غسل کی سالانہ رسم کل ادا کر دی گئی

مکہ مکرمہ(اُردو پوائنٹ اخبارتازہ ترین،17ستمبر 2019ء) غسلِ کعبہ کی مبارک رسم گزشتہ روز خانہ کعبہ میں ادا کر دی گئی۔ غسلِ کعبہ کی یہ سالانہ رسم گورنر مکہ شہزادہ خالد الفیصل، خادم حرمین شریفین سعودی فرمانروا شاہ سلمان بن عبدالعزیز کی نیابت میں ادا کی گئی۔ اس رسم کی ادائیگی کے وقت مکہ کے نا ئب گورنر شہزادہ بدر بن سلطان، مسجد الحرام اور مسجد نبوی انتظامیہ کے سربراہ شیخ ڈاکٹر عبدلرحمان السدیس، سعودی عرب میں متعین مسلم سفارتکار، ممتاز علماء، وزرا، کلید برداران کعبہ اور مقامی شہری بھی شریک تھے۔

اس موقع پر کعبہ کو عرقِ گلاب سے معطر آب زم زم سے غسل دیا گیا اور اس کی اندرونی دیواروں کو بھی معطر پانی سے دھویا گیا۔ سبق نیوز ویب سائٹ کے مطابق حرمین شریفین کی انتظامیہ کے سربراہ شیخ ڈاکٹر عبدالرحمن السدیس نے بتایا ہے کہ خانہ کعبہ کو غسل دینے کی یہ رسم سعودی مملکت کے بانی شاہ عبدالعزیز کے دور میں شروع کی گئی تھی، بعد میں تمام سعودی فرمانروا اس مبارک رسم کو نبھاتے رہے اور اب موجودہ دور میں شاہ سلمان بن عبدالعزیز اورولی عہد شہزادہ محمد بن سلمان بھی اس رسم کو ادا کر رہے ہیں۔

(جاری ہے)

شروع شروع میں خانہ کعبہ کو غسل دینے کی رسم سال میں دو مرتبہ یکم شعبان اور پھر محرم میں ادا کی جاتی تھی۔ تاہم اب یہ رسم سال میں صرف ایک مرتبہ 15 محرم الحرام کو ادا کی جاتی ہے۔ غسلِ کعبہ کا منظر بہت رُوح پرور ہوتا ہے، اس موقع پر اہم سعودی شخصیات کے علاوہ دیگر ممالک کے مسلمان سفیروں کی بھی بڑی تعداد شرکت کرتی ہے۔