عوام پر امید رہیں آنے والا دور انصاف اور قانون کی بالادستی کا ہے ،فتح اللہ خان

منگل 17 ستمبر 2019 13:55

گلگت ۔ (اُردو پوائنٹ اخبارتازہ ترین - اے پی پی۔ 17 ستمبر2019ء) پاکستان تحریک انصاف گلگت بلتستان کے جنرل سیکریٹری فتح اللہ خان نے کہا ہے کہ عوام پر امید رہیں آنے والا دور انصاف اور قانون کی بالادستی کا ہے جن لوگوں نے عوامی بجٹ کو لوٹا ہے ان کا احتساب ہو رہا ہے۔

(جاری ہے)

انہوں نے کہا کہ جن لوگوں نے عوام کو لالی پاپ دیکر سلانے کی کوشش کی ہے اب ان لوگوں کے لئے کہیں بھی راستہ نظر نہیں آرہا ہے اور سیاست میں زندہ رہنے کیلئے مفروضوں کی بنیاد پر بیانات دیکر خود کو بھی دھوکہ دے رہے ہیں اور عوام کو بھی دھوکہ دینے کی کوشش میں لگے ہوئے ہیں لیکن عوام اب مفروضوں کی دنیا سے نکل گئی ہے عوام کو تجربہ ہوا ہے کہ باریاں لینے والی ان جماعتوں کو نہ عوام کا مفاد عزیز ہے اور نہ ہی گلگت بلتستان کا مفاد عزیز ہے۔

انہوں نے کہا کہ جس طرح مرکز میں احتساب چل رہا ہے اس کے خوف سے ابھی سے ہی گلگت بلتستان میں باریاں لینے والی جماعتوں میں ہلچل مچ گئی ہے قومی خزانے کو لوٹنے والے کبھی بھی بخشے نہیں جائینگے انہوں نے کہا کہ نیب کے دفتر کی گھنٹی کی آواز کرپشن کرنے والوں کے کانوں میں پڑ رہی ہے اس لئے اب اپنے آپ کو بچانے کے لئے پھڑپھڑا رہے ہیں لیکن نیب کا شکنجہ اتنا کمزور نہیں ہے اور ان کے آقائوں کی طرح ان کا ٹھکانہ بھی جیل ہے۔