پی ٹی آئی کے دور میں نوجوانوں کی بدولت پاکستان کو ترقی کی راہ پر گامزن کریں گے‘اعجاز عالم آگسٹین

لاہور(اُردو پوائنٹ اخبارتازہ ترین - این این آئی۔ 17 ستمبر2019ء) صوبائی وزیر انسانی حقوق اعجاز عالم آگسٹین نے کہا ہے کہ پاکستان کی 64 فیصد آبادی نوجوانوں پر مشتمل ہے جو ملک کے روشن مستقبل و خوشحالی کیلئے ایک نیک شگون ثابت ہوگا جبکہ دوسری طرف یہ کسی بھی حکومت کے لئے ایک ایسا چیلنج ہے، جسکے لئے ایک جامع پالیسی پر عملدرآمد یقینی بنانا ہوگا اور اس حوالے سے پنجاب حکومت اپنی ذمہ داری سے بخوبی آگا ہے۔

انہوں نے کہاکہ ہمارے نوجوانوں کو سازگار ماحول فراہم کرناحکومت کی اولین ترجیحات میں شامل ہے اور حالیہ بجٹ میں تعلیم اور روزگار وغیرہ کی فراہمی یقینی بنانے کیلئے نمایاں فنڈز مختص کئے گئے ہیں۔ ان خیالات کا اظہار آج صوبائی وزیر نے نوجوانوں کے ایک وفد کے ساتھ ملاقات کے دوران کیا جبکہ وفد کی قیادت چیئرمین پنجاب یوتھ کونسل حمزہ کرامت نے سینئر رہنماء وحید احمد خان کے ساتھ ملکر کی۔

(جاری ہے)

وفد نے صوبائی وزیر کو نوجوانوں کو درپیش مسائل بارے آگاہ کیا اور تحریک انصاف کی حکومت کی جانب سے نوجوانوں کیلئے کئے جانیوالے اقدامات کو سراہتے ہوئے امید ظاہر کی کہ مستقبل میں بھی نوجوانوں کیلئے مزید مثبت اقدمات یقینی بنائے جائیں گے۔صوبائی وزیر اعجاز عالم نے کہا کہ ہماری تمام تر توجہ نوجوانوں کے مستقبل کو روشن بنانے کی جانب مرکوز ہے اور مذہبی اقلیتی نوجوانوں کے مسائل کو بھی ترجیحی بنیادوں پر حل کیا جارہا ہے۔